कोलंबो : नामिबिया विरूद्धच्या सामन्यात १०२ धावांनी विजय मिळवत पाकिस्तानने सुपर ८ फेरीत प्रवेश केला. कोलंबोच्या सिंहलीज स्पोर्ट्स क्लबच्या मैदानावर झालेल्या या सामन्यात नाणेफेक जिंकून पाकिस्तानने फलंदाजीचा निर्णय घेतला. त्यांनी २० षटकांत ३ बाद १९९ धावा केल्या. धावांचा पाठलाग करणाऱ्या नामिबियाचा डाव १७.३ षटकांत ९७ धावांवर आटोपला. या सामन्यात पाकिस्तानच्या साहिबजादा फरहानने नाबाद शतक केले. तोच सामनावीर झाला.
नामिबियाकडून लॉरेन स्टीनकॅम्पने २३, जॅन फ्रायलिंकने ९, जॅन निकोल लॉफ्टी-ईटनने ५ (धावबाद), गेरहार्ड इरास्मसने ७, अलेक्झांडर वोल्शेंकने २०, जेजे स्मितने ९, झेन ग्रीनने ७, रुबेन ट्रम्पेलमनने शून्य, विलेम मायबर्गने ८, बर्नार्ड स्कोल्झने १, जॅक ब्रासेलने नाबाद १ धावांचे योगदान दिले. पाकिस्तानकडून उस्मान तारिकने ४, शादाब खानने ३, मोहम्मद नवाजने १ आणि सलमान मिर्झाने १ विकेट घेतली.
पाकिस्तानच्या साहिबजादा फरहानने नामिबिया विरुद्ध खेळताना ५८ चेंडूत ४ षटकार आणि ११ चौकार मारत नाबाद १०० धावा केल्या. सईम अयुब १४, सलमान आगा ३८, ख्वाजा नाफे ५ धावा करुन परतला. शादाब खानने नाबाद ३६ धावा केल्या. नामिबियाकडून जॅक ब्रासेलने २ तर गेरहार्ड इरास्मसने १ विकेट घेतली.
भारतापाठोपाठ पाकिस्तानही सुपर ८ फेरीत
अ गटातून (ए ग्रुप) अनुक्रमे भारत आणि पाकिस्तान हे दोन देश सुपर ८ फेरीसाठी पात्र ठरले आहेत. ब गटातून (बी ग्रुप) श्रीलंका आणि झिम्बाब्वे, क गटातून (सी ग्रुप) वेस्ट इंडिज आणि इंग्लंड, ड गटातून (डी ग्रुप) दक्षिण आफ्रिका आणि न्यूझीलंड हे संघ सुपर ८ (सुपर एट) फेरीसाठी पात्र झाले आहेत. उर्वरित १२ संघांचे आयसीसी पुरुष टी ट्वेंटी वर्ल्डकपमधील आव्हान संपले आहे. पाकिस्तान हा सुपर ८ फेरीसाठी पात्र ठरलेला आठवा संघ ठरला.