नवी मुंबई : घरगुती शिकवणी वर्गात विद्यार्थिनीला शारीरिक शिक्षा दिल्याचा आरोप पुढे आला असून या घटनेमुळे पालकांमध्ये संताप व्यक्त होत आहे. आठवी इयत्तेत शिकणाऱ्या मुलीला पाढे पाठ नसल्याच्या कारणावरून शिक्षिकेने मारहाण केल्याची तक्रार रबाळे पोलीस ठाण्यात नोंदवली गेली आहे.
नेमकं घडलं काय ?
नवी मुंबईतील गोठीवली परिसरात राहणारी संबंधित विद्यार्थिनी नियमितपणे एका खासगी शिकवणीला जात होती. पूर्ण पाढे पाठ न केल्याने शिक्षिकेने संतापाच्या भरात तिला पलित्याने मारहाण केली असाआरोप कुटुंबीयांनी केला आहे.
पलित्याने मुलीच्या हातावर अनेक वेळा मारण्यात आले, जवळपास ४० वेळा त्यानंतर हात सुजला असून जखमा झाल्या आहेत शिवाय मुलीचा हात प्रचंड दुखातही आहे.
प्रकार उघडकीस कसा आला?
घरी आल्यानंतर मुलीने घडलेली घटना आईला सांगितली. हातावर आलेली सूज आणि दुखणं लक्षात येताच कुटुंबीयांनी शिक्षिकेशी संपर्क साधला. मात्र, आरोपानुसार शिक्षिकेने विद्यार्थिनी अभ्यास करत नसल्याचे सांगत आपण जे केले ते अगदी योग्यच आहे. अडचण असल्यास दुसरीकडे शिकवणी लावावी, असे उत्तर दिल्याचा दावा आहे.
पोलिसांत नोंद, तपासाची प्रक्रिया सुरू
या प्रकरणी पालकांनी रबाळे पोलीस ठाणे येथे लेखी तक्रार दिली आहे. पोलिसांनी घटनेची नोंद घेत चौकशी सुरू केली असून दोन्ही बाजूंचे जबाब नोंदवले जात आहेत.