पल्लेकेले : आयसीसी पुरुष टी ट्वेंटी वर्ल्डकप स्पर्धेतील शेवटच्या साखळी सामन्यात ऑस्ट्रेलियाने ओमानचा पराभव केला. या सामन्याचा निकाल ऑस्ट्रेलियाच्या बाजूने लागला तरी त्यांचे वर्ल्डकपमधील आव्हान आधीच संपले आहे, त्यात बदल होणार नाही. ओमान विरुद्धचा सामना नऊ विकेट राखून जिंकत ऑस्ट्रेलियाने यंदाच्या वर्ल्डकपमधील त्यांच्या प्रवासाचा गोड शेवट केला. ऑस्ट्रेलियाने नाणेफेक जिंकली आणि गोलंदाजी करण्याचा निर्णय घेतला. गोलंदाजी करणाऱ्या ऑस्ट्रेलियाने ओमानला १६.२ षटकांत गुंडाळले. ओमानने फक्त १०४ धावा केल्या. धावांचा पाठलाग करणाऱ्या ऑस्ट्रेलियाने ९.४ षटकांत एक बाद १०८ धावा केल्या. ओमानच्या चार फलंदाजांना बाद करणारा ऑस्ट्रेलियाचा अॅडम झंपा सामनावीर झाला. त्याने ३.२ षटकांत २१ धावा देत चार बळी घेतले. झंपाने हम्माद मिर्झा (१६ धावा), मोहम्मद नदीम (२ धावा), शकील अहमद (३ धावा), शफीक जान (शून्य धावा) या चौघांना बाद केले.
ओमानची फलंदाजी
प्रथम फलंदाजीसाठी आलेल्या ओमानकडून आमिर कलीमने शून्य, जतिंदर सिंगने १७, करण सोनावलेने १२, हम्माद मिर्झाने १६, वसीम अलीने ३२, मोहम्मद नदीमने २, विनायक शुक्लाने ९, जितेन रामानंदीने १, शकील अहमदने ३, जय ओडेद्राने नाबाद ४, शफीक जॉनने शून्य धावांचे योगदान दिले. ऑस्ट्रेलियाकडून झंपाने ४ तर ग्लेन मॅक्सवेल आणि झेवियर बार्टलेटने प्रत्येकी २, नॅथन एलिस आणि मार्कस स्टोइनिसने प्रत्येकी १ विकेट घेतली.
ऑस्ट्रेलियाची फलंदाजी
धावांचा पाठलाग करणाऱ्या ऑस्ट्रेलियाकडून सलामीला आलेल्या कर्णधार मिचेल मार्शने ३३ चेंडूत ४ षटकार आणि ७ चौकार मारत नाबाद ६४ धावा केल्या. ट्रॅव्हिस हेडने १९ चेंडूत ६ चौकार मारत ३२ धावा केल्या. त्याला शकील अहमदने स्वतःच्या चेंडूवर स्वतःच झेलबाद केले. जोश इंगलिसने ६ चेंडूत २ चौकार मारत नाबाद १२ धावा केल्या.