पुणे : पुणे जिल्ह्यातील इंदापूर तालुका मधील भिगवण येते घडलेल्या अपहरण प्रकरणाचे दिवसेंदिवस नवीन पैलू उलघडत जात आहेत या प्रकरणाला आणखी एक वळण मिळाले आहे.
तर झालं असं
मागच्या आठवड्यात भिगवण येथे जे घडल ते संपूर्ण राज्याला हादरवणारे होत. आई आणि भावाच्या डोळ्यात मिरचीची पूड टाकत मुलीला पळवून नेले, आणि काही दिवसांनी त्याच मुलीने आपण स्वखुशीने पळून आलोय असा व्हिडीओ शेअर केला, ज्यामुळे पोलिसही चक्रावून गेले. हा खटला न्यायालयात मांडण्यात आला.
जबाब नोंदवून झाल्यानंतर मुलगी न्यायालयाच्या आवारातून बाहेर आली. समोर तिची आई मुलीच्या भेटीसाठी आस लावून बसली होती. डोळ्यातून अश्रूच्या धारा वाहत होत्या... गहिवरलेल्या मनाने 'माझी मुलगी मला परत द्या' अशी गयावया करत होती. मात्र मुलीला आईच्या मायेचा पाझर फुटला नाही. आईकडे न पाहता मुलीने पोलिसांच्या गाडीकडे धाव घेतली.
आईच म्हणणं काय आहे?
एकीकडे तरुणी स्वतःच्या इच्छेने गेल्याचा दावा करत असताना, दुसरीकडे तिच्या आईने माझी मुलगी पळून गेलेली नाही, तिला जबरदस्तीने नेण्यात आले, असा आरोप केला आहे. दोघांचाही जबाब पोलिसांनी नोंदवला आहे. तरुणी आणि तिच्या आईच्या विधानांमध्ये प्रचंड तफावत असल्याने या प्रकरणाचा नेमका छडा लागेपर्यंत तपास सुरु असल्याची माहिती पोलिसांनी दिली आहे.
दरम्यान न्यायालयासमोर दंड प्रक्रिया संहिता कलम १६४ अंतर्गत नोंदवलेल्या जबाबात तरुणीने आईकडे जाण्यास नकार दिला आहे. सध्या तिला सुधारगृहात ठेवून समुपदेशन केले जाणार आहे. या प्रकरणाचा तपास अद्याप सुरू असून, पुढील चौकशीतून नेमके सत्य काय समोर येते, याकडे संपूर्ण राज्याचे लक्ष लागले आहे.