वॉशिंग्टन : अमेरिकेच्या ईशान्य भागात एका शक्तिशाली हिमवादळाने प्रचंड कहर माजवला आहे. मेरीलँडपासून मेनपर्यंतचे विस्तीर्ण भाग जाड बर्फाच्या चादरीखाली झाकले गेले आहेत. या भीषण हवामानामुळे शनिवार ते मंगळवारदरम्यान १०,००० हून अधिक उड्डाणे रद्द करण्यात आली आहेत. केवळ सोमवारीच ५,००० पेक्षा जास्त उड्डाणे रद्द झाली, तर मंगळवारसाठी १,३०० हून अधिक उड्डाणे आधीच रद्द करण्यात आली असून हजारो प्रवासी अडकले आहेत. न्यूयॉर्कमधील जॉन एफ. केनेडी आंतरराष्ट्रीय विमानतळ, लागार्डिया विमानतळ आणि बोस्टनमधील लोगान आंतरराष्ट्रीय विमानतळ सर्वाधिक प्रभावित झाले आहेत.
हवामान तज्ज्ञांनी याला अनेक दशकातील सर्वात शक्तिशाली वादळ म्हटले असून याला ‘बॉम्ब चक्रवात’ असे संबोधले जात आहे. ‘बॉम्ब चक्रवात’ म्हणजे २४ तासांच्या कालावधीत वादळाचा हवेचा दाब झपाट्याने ठरावीक प्रमाणात कमी होणे. हा प्रकार प्रामुख्याने शरद ऋतू आणि हिवाळ्यात घडतो, जेव्हा आर्क्टिकमधील थंड, बर्फाळ हवा दक्षिणेकडील उष्ण हवेच्या संपर्कात येते. अनेक भागांत दोन फूट (६० सेंटीमीटर) पेक्षा अधिक हिमवर्षाव झाला आहे. रोड आयलंड राज्यातील वारविक येथे तर तीन फूटांहून अधिक बर्फ साचला आहे.
जोरदार वारे आणि मुसळधार हिमवर्षावामुळे न्यूयॉर्क, न्यू जर्सी आणि मॅसॅच्युसेट्ससह अनेक राज्यांत आपत्कालीन स्थिती जाहीर करण्यात आली आहे. वादळाचा परिणाम इतका तीव्र आहे की संयुक्त राष्ट्रांना सुरक्षा परिषदेची बैठक पुढे ढकलावी लागली तसेच मुख्यालयही बंद ठेवावे लागले. न्यूयॉर्क शहरात सहा वर्षांनंतर प्रथमच हिमवर्षावामुळे शाळा बंद ठेवण्यात आल्या. मात्र महापौर जोहरान ममदानी यांनी मंगळवारपासून शाळा सुरू करण्याची घोषणा केली असून काही अधिकाऱ्यांनी त्याला विरोध दर्शवला आहे.
वाहतूक व्यवस्था पूर्णपणे विस्कळीत झाली आहे. रेल्वे आणि बस सेवा स्थगित करण्यात आल्या आहेत. रस्त्यांवरील घसरडी स्थिती आणि कमी दृश्यमानतेमुळे प्रवास करणे अत्यंत धोकादायक झाले आहे. प्रशासनाने नागरिकांना घरातच राहण्याचे आवाहन केले आहे. डोअरडॅशसारख्या वितरण सेवांनीही आपली सेवा थांबवली आहे.
वादळामुळे वीजपुरवठ्यावरही मोठा परिणाम झाला आहे. पॉवरआउटेज डॉट यूएसच्या माहितीनुसार, पूर्व किनारपट्टीवर ५,७०,००० हून अधिक घरे आणि व्यावसायिक आस्थापनांमध्ये वीज खंडित झाली आहे. मॅसॅच्युसेट्स आणि न्यू जर्सी येथे परिस्थिती सर्वाधिक गंभीर आहे. जोरदार वाऱ्यांमुळे वीजपुरवठा पूर्ववत करण्यासाठी कर्मचाऱ्यांना मोठ्या अडचणींचा सामना करावा लागत आहे.
दरम्यान, काही नागरिक या हवामानाचा आनंद घेतानाही दिसत आहेत. टाइम्स स्क्वेअर येथे पर्यटक नाचताना दिसले, तर काही जण स्लेजिंगचा आनंद घेत होते. मात्र हवामान खात्याने इशारा दिला आहे की धोका अद्याप टळलेला नाही. आठवड्याच्या शेवटी आणखी एक वादळ येण्याची शक्यता असून परिस्थिती आणखी बिघडू शकते. प्रशासनाने नॅशनल गार्डची तैनाती केली असून मदत आणि बचावकार्य सुरू आहे.