छत्रपती संभाजीनगर: शहरातील MGM Hospital परिसरात एका महिलेची छेडछाड व मारहाण झाल्याचा गंभीर आरोप समोर आला आहे. या प्रकरणात दोन परदेशी (नायजेरियन) तरुणांचा सहभाग असल्याचे प्राथमिक माहितीतून समोर आले आहे.
मिळालेल्या माहितीनुसार, एमजीएम हॉस्पिटल रोडवर संबंधित तरुणांनी एका महिलेची छेड काढल्याचा आरोप आहे. तसेच महिलेला मारहाण केल्याचेही प्रत्यक्षदर्शींनी सांगितले. ही घटना परिसरात समजताच स्थानिक नागरिक संतप्त झाले आणि मोठी गर्दी जमा झाली.
संतप्त जमावाने दोन्ही तरुणांना पकडून भररस्त्यात मारहाण केली. काही काळ परिसरात तणावपूर्ण वातावरण निर्माण झाले होते. परिस्थिती हाताबाहेर जाण्याची शक्यता लक्षात घेऊन पोलिसांनी तातडीने घटनास्थळी धाव घेतली. सुरुवातीला जमावाला शांत करणे आव्हानात्मक ठरले; मात्र पोलिसांनी हस्तक्षेप करून संबंधित तरुणांना जमावाच्या तावडीतून सोडवले आणि ताब्यात घेतले.
सध्या दोन्ही तरुणांची चौकशी सुरू असून, महिलेच्या तक्रारीची सत्यता पडताळण्यासाठी सीसीटीव्ही फुटेज आणि प्रत्यक्षदर्शींचे जबाब नोंदवले जात आहेत. परिसरात कायदा व सुव्यवस्था राखण्यासाठी पोलीस बंदोबस्त वाढवण्यात आला आहे.
पोलीस प्रशासनाने नागरिकांना अफवांवर विश्वास न ठेवता शांतता राखण्याचे आवाहन केले आहे