नवी मुंबई : सिडकोतर्फे राबविण्यात येत असलेल्या १६,८७६ घरांच्या “माझे पसंतीचे सिडकोचे घर – माझा फर्स्ट चॉइस नवी मुंबईमध्ये” या गृहनिर्माण योजनेत पर्याय निवडीसाठी मुदतवाढ जाहीर करण्यात आली आहे. नागरिकांचा वाढता प्रतिसाद लक्षात घेऊन आता पसंतीचे घर निवडण्यासाठी १९ मार्च २०२६ पर्यंत मुदत देण्यात आली आहे.
ही योजना शहर आणि औद्योगिक विकास महामंडळ मार्फत राबविण्यात येत असून प्रधानमंत्री आवास योजनेंतर्गत आर्थिकदृष्ट्या दुर्बल घटक (EWS) आणि अल्प उत्पन्न गट (LIG) यांच्यासाठी घरे उपलब्ध करून देण्यात आली आहेत.
वाशी, बामणडोंगरी, खारकोपर, खारघर, तळोजा, मानसरोवर, खांदेश्वर, पनवेल आणि कळंबोली या नोडमध्ये ही घरे उपलब्ध आहेत. प्रस्तावित नवी मुंबई आंतरराष्ट्रीय विमानतळ परिसरात उभारण्यात येणाऱ्या या गृहसंकुलांना रेल्वे, महामार्ग आणि मेट्रोची चांगली जोडणी मिळणार आहे.
या योजनेअंतर्गत अनामत रक्कम भरण्याची अंतिम तारीख १५ मार्च २०२६ असून पसंतीचे पर्याय निवडण्याची अंतिम तारीख १९ मार्च २०२६ आहे. इच्छुकांनी [www.cidcohomes.com](http://www.cidcohomes.com) या अधिकृत संकेतस्थळावर जाऊन अर्ज प्रक्रिया पूर्ण करावी.
योजनेबाबतची अधिकृत माहिती सिडकोकडून प्रसिद्ध करण्यात येणाऱ्या निवेदनांद्वारे तसेच अधिकृत समाजमाध्यमांवर उपलब्ध करून दिली जाते. नागरिकांनी अफवा किंवा अप्रमाणित माहितीवर विश्वास न ठेवता अधिकृत स्त्रोतांवरच भर द्यावा, असे आवाहन करण्यात आले आहे.
मोक्याच्या ठिकाणी उपलब्ध असलेल्या या घरांना मोठा प्रतिसाद मिळत असल्यानेच मुदतवाढ देण्यात आल्याचे सिडकोने स्पष्ट केले आहे. नागरिकांनी या संधीचा लाभ घेऊन स्वतःचे घर मिळवण्याचे स्वप्न पूर्ण करावे, असे आवाहन करण्यात आले आहे.