कोलकाता : ईडन गार्डनवर झालेल्या सुपर आठ फेरीतल्या वेस्ट इंडिज विरूद्धच्या सामन्यात भारत पाच विकेट राखून जिंकला. या सामन्यात भारताचा सलामीवीर संजू सॅमसनची बॅट तळपली. संजूने ५० चेंडूत ४ षटकार आणि १२ चौकार मारत नाबाद ९७ धावा केल्या. तोच आजच्या सामन्याचा सामनावीर झाला. वेस्ट इंडिजने दिलेले २० षटकांत १९६ धावा करण्याचे आव्हान भारताने १९.२ षटकांत ५ विकेट गमावून पूर्ण केले. या विजयासह भारत दिमाखात उपांत्य फेरीत (सेमी फायनल) पोहोचला. आता गुरुवार पाच मार्च रोजी मुंबईच्या वानखेडे स्टेडियमवर इंग्लंड विरुद्ध भारत हा उपांत्य फेरीचा सामना रंगणार आहे. भारतीय वेळेनुसार संध्याकाळी सात वाजता सामना सुरू होणार आहे.
भारताची फलंदाजी
वेस्ट इंडिजने दिलेल्या आव्हानाचा पाठलाग करताना भारताकडून अभिषेक शर्माने १०, संजू सॅमसनने नाबाद ९७, ईशान किशनने १०, सूर्यकुमार यादवने १८, तिलक वर्माने २७, हार्दिक पांड्याने १७, शिवम दुबेने नाबाद ८ धावा केल्या. वेस्ट इंडिजकडून जेसन होल्डर आणि शमर जोसेफने प्रत्येकी २ तर अकील होसेनने १ विकेट घेतली.
वेस्ट इंडिजची फलंदाजी
शाई होपने ३३ चेंडूत १ षटकार आणि ३ चौकार मारत ३२ धावा केल्या, त्याला वरुण चक्रवर्तीने त्रिफळाचीत केले. रोस्टन चेसने २५ चेंडूत १ षटकार आणि ५ चौकार मारत ४० धावा केल्या, त्याला जसप्रीत बुमराहने सूर्यकुमार यादवकरवी झेलबाद केले. शिमरॉन हेटमायरने १२ चेंडूत २ षटकार आणि १ चौकार मारत २७ धावा केल्या, त्याला जसप्रीत बुमराहने संजू सॅमसनकरवी झेलबाद केले. शेरफेन रदरफोर्डने ९ चेंडूत १ षटकार मारत १४ धावा केल्या, त्याला हार्दिक पांड्याने संजू सॅमसनकरवी झेलबाद केले. रोवमन पॉवेलने १९ चेंडूत २ षटकार आणि ३ चौकार मारत नाबाद ३४ धावा केल्या. जेसन होल्डरने २२ चेंडूत ३ षटकार आणि २ चौकार मारत नाबाद ३७ धावा केल्या.
बुमराहसमोर हेटमायर हतबल
जसप्रीत बुमराहने वेस्ट इंडिजच्या चार पैकी दोन फलंदाजांना बाद केले. विशेष म्हणजे बुमराहने शिमरॉन हेटमायरला बाद केले. आंतरराष्ट्रीय टी ट्वेंटी क्रिकेटमध्ये बुमराहने हेटमायरला आतापर्यंत सहा वेळा बाद केले आहे. बुमराहने हेटमायरला आंतरराष्ट्रीय टी ट्वेंटी क्रिकेटमध्ये आतापर्यंत २३ चेंडू टाकून ६ वेळा बाद केले आहे. आजच्या सामन्यात शिमरॉन हेटमायरने १२ चेंडूत २ षटकार आणि १ चौकार मारत २७ धावा केल्या, त्याला जसप्रीत बुमराहने संजू सॅमसनकरवी झेलबाद केले.