नवी दिल्ली : भारतीय जनता पक्षाने अर्थात भाजपने बिहारमधून आगामी राज्यसभा निवडणुकीसाठी पक्षाचे उमेदवार म्हणून त्यांचे राष्ट्रीय अध्यक्ष नितीन नवीन यांना उमेदवारी जाहीर केली आहे. लवकरच ते राज्यसभेच्या निवडणुकीसाठी उमेदवारी अर्ज भरतील.
भाजपने राज्यसभेच्या निवडणुकीसाठी उमेदवारांची यादी जाहीर केली आहे. पक्षाने बिहार, आसाम, छत्तीसगड, हरियाणा, ओडिशा आणि पश्चिम बंगालमधील नऊ उमेदवारांची नावं जाहीर केली आहेत. भाजपाध्यक्ष बिहारमधून राज्यसभेची निवडणूक लढवणार आहेत. राज्यसभा निवडणुकीसाठी तिकिटे वाटप करताना भाजपने मजबूत संघटनात्मक प्रभाव असलेल्या नेत्यांना प्राधान्य दिले आहे.
देशातील दहा राज्यांतील राज्यसभेच्या ३७ जागांसाठी १६ मार्च रोजी मतदान होणार आहे. या निवडणुकीसाठी अधिसूचना जारी झाली आहे. उमेदवारी अर्ज भरण्याची शेवटची तारीख ५ मार्च आहे.
भाजपचे राष्ट्रीय अध्यक्ष नितीन नवीन यांना बिहारमधून राज्यसभेच्या निवडणुकीसाठी पक्षाचे उमेदवार म्हणून जाहीर केले आहे. नितीन नवीन यांनी पाटण्याच्या बांकीपूर येथून पाच वेळा आमदार म्हणून काम केले आहे आणि बिहारच्या राजकारणात त्यांचे मजबूत अस्तित्व आहे. भाजपने पक्षातील एक प्रमुख व्यक्ती राहुल सिन्हा यांना पश्चिम बंगालमधून उमेदवारी दिली आहे. युवा नेते शिवेश कुमार यांनाही भाजपने बिहारमधून राज्यसभेसाठी उमेदवारी दिली आहे. बिहारमध्ये राज्यसभेच्या पाच जागांसाठी निवडणुका होत आहेत.
पक्षाने आसाममधून तेराश गोवाला आणि जोगेन मोहन यांना उमेदवारी दिली आहे. दोन्ही नेत्यांनी राज्याच्या राजकारणात महत्त्वाची भूमिका बजावली आहे. आसाममध्ये राज्यसभेच्या तीन जागांसाठी निवडणुका होत आहेत. भाजपने ओडिशामधून मनमोहन सामल आणि सुजित कुमार यांना उमेदवारी दिली आहे.
भाजपने छत्तीसगडमधून लक्ष्मी वर्मा यांना उमेदवारी दिली आहे. त्या भाजप महिला मोर्चामध्ये सक्रिय आहेत आणि त्यांच्या सामाजिक कार्यासाठी ओळखल्या जातात. छत्तीसगडमध्ये राज्यसभेच्या दोन जागा रिक्त होत आहेत. यातील एका जागेवर भाजपच्या उमेदवार लक्ष्मी वर्मा आहेत. प्रशासकीय पार्श्वभूमी असलेले आणि पक्ष संघटनेत महत्त्वाची भूमिका बजावणारे संजय भाटिया यांना हरियाणामधून उमेदवारी देण्यात आली आहे. हरियाणामध्ये राज्यसभेच्या दोन जागांसाठी निवडणुका होत आहेत.