आयसीसी पुरुष टी-20 विश्वचषकातून पाकिस्तानचा संघ बाहेर पडला असला, तरी आता एका नव्या वादामुळे पाकिस्तानी खेळाडू पुन्हा चर्चेत आले आहेत. श्रीलंकेतील कँडी येथे मुक्कामादरम्यान पाकिस्तानच्या एका खेळाडूने हॉटेलमधील महिला कर्मचाऱ्याशी गैरवर्तन केल्याचा आरोप समोर आला आहे. ‘टेलिकॉम एशिया स्पोर्ट’च्या अहवालात याबाबत दावा करण्यात आला आहे.
नेमकी घटना काय?
मिळालेल्या माहितीनुसार, श्रीलंकेविरुद्धच्या शेवटच्या सुपर ८ सामन्यापूर्वी ही घटना घडली. कँडीतील ‘गोल्डन क्राऊन हॉटेल’मध्ये पाकिस्तानचा संघ थांबला असताना एका खेळाडूने हाऊसकीपिंग विभागातील महिला कर्मचाऱ्याशी विनयभंग केला.
महिलेने मदतीसाठी आरडाओरडा केल्यानंतर हॉटेलमधील इतर कर्मचारी तातडीने घटनास्थळी पोहोचले. त्यानंतर या प्रकरणाची माहिती पाकिस्तान संघाचे व्यवस्थापक नवीद चीमा यांना देण्यात आली.
हॉटेल व्यवस्थापनाची कठोर कारवाईची मागणी :
या घटनेनंतर हॉटेल व्यवस्थापनाने संबंधित खेळाडूवर कठोर कारवाई करण्याची मागणी केली. मात्र, संघ व्यवस्थापकांनी खेळाडूच्या वतीने माफी मागत त्याच्यावर तातडीने दंड लावून प्रकरण मिटवण्याचा प्रयत्न केल्याचे सांगितले जात आहे.
पीसीबीकडून पुढील कारवाईची शक्यता :
पाकिस्तान संघ मायदेशी परतल्यानंतर या घटनेची गंभीर दखल घेतली जात आहे. संबंधित खेळाडूला पाकिस्तान क्रिकेट बोर्डाच्या (पीसीबी) शिस्तभंग समितीसमोर हजर राहावे लागू शकते. टीम मॅनेजरने दंड ठोठावला असला तरी बोर्डाकडून अतिरिक्त कारवाई किंवा बंदीची शक्यता वर्तवली जात आहे.
पूर्वीही वादात पाकिस्तानी खेळाडू :
पाकिस्तानी खेळाडू किंवा सपोर्ट स्टाफ गैरवर्तनाच्या आरोपांमुळे यापूर्वीही वादात सापडले आहेत. गेल्या वर्षी इंग्लंड दौऱ्यादरम्यान मँचेस्टर पोलिसांनी फलंदाज हैदर अली याला बलात्काराच्या आरोपावरून अटक केली होती, मात्र पुराव्याअभावी त्याची सुटका झाली होती.
तसेच काही वर्षांपूर्वी मलेशिया दौऱ्यावेळी पाकिस्तान संघाच्या मसाज देणाऱ्या मलंग अली यांच्यावरही महिला कर्मचाऱ्याशी गैरवर्तन केल्याचा आरोप झाला होता आणि त्यांना दंडही ठोठावण्यात आला होता.
या नव्या घटनेमुळे पाकिस्तानी संघाच्या शिस्तीबाबत पुन्हा एकदा प्रश्नचिन्ह निर्माण झाले आहे.