मुंबई : पश्चिम आशियातील संघर्षाचा परिणाम मुंबईसह जगभरातील शेअर बाजारांवर दिसून आला. आठवड्याच्या पहिल्याच दिवशी म्हणजे सोमवार ९ मार्च २०२६ रोजी मुंबईचा शेअर बाजार दोन हजारांपेक्षा जास्त अंकांनी घसरला. तर कच्च्या तेलाची किंमत ११५ डॉलरवर पोहोचली. सर्व प्रमुख शेअर बाजारांमध्ये मोठ्या प्रमाणात विक्री झाल्यामुळे दोन ते तीन टक्क्यांची घसरण झाली. या घसरणीमुळे शेअर बाजारातील गुंतवणूकदारांचे सुमारे बार लाख कोटी रुपयांचे नुकसान झाले.
सकाळी १०:३० वाजता एनएसईचा निफ्टी फिफ्टी निर्देशांक ६८६.८५ अंकांनी किंवा २.८टक्क्यांनी घसरून २३,६६३.६० अंकांवर पोहोचला, जो एप्रिल २०२५ मध्ये अमेरिकेचे अध्यक्ष डोनाल्ड ट्रम्प यांनी पहिल्यांदा टॅरिफ जाहीर केल्यापासूनचा सर्वात कमी स्तर आहे. बीएसई सेन्सेक्स निर्देशांक ७६,७२७.९९ अंकांवर आहे, जो २,१९०.९२ अंकांनी किंवा २.८ टक्क्यांनी घसरला आहे. संपूर्ण सेन्सेक्स लाल रंगात आहे. बाजारातील अस्थिरता दर्शविणारा इंडिया VIX, सत्राच्या सुरुवातीला २२ टक्क्यांनी वाढून २४ अंकांपेक्षा जास्त झाला, जो जवळजवळ २ वर्षातील सर्वोच्च स्तर आहे.
जागतिक शेअर बाजारांमध्ये विक्रीचा जोर वाढल्यानंतर हे घडले आहे. शुक्रवारी अमेरिकन बाजार एक - दोन टक्के घसरले. सर्व आशियाई बाजारांनी आठवड्याची सुरुवात घसरणीने केली, जपान आणि दक्षिण कोरियामधील निर्देशांक सात ते आठ टक्के घसरले.
सोमवारी सकाळी कच्च्या तेलाच्या वाढत्या किमतींचा परकीय चलन बाजारावर परिणाम झाल्यामुळे रुपयाही डॉलरच्या तुलनेत ९२.३२ वर घसरला, म्हणजेच ५७ पैशांनी घसरला. युद्ध सुरू झाल्यापासून रुपया दबावाखाली आहे, ज्यामुळे रिझर्व्ह बँकेला घसरण रोखण्यासाठी डॉलर्सची विक्री करून मोठ्या प्रमाणात हस्तक्षेप करावा लागला.
इंडिगो ऑपरेटर इंटरग्लोब एव्हिएशनचे शेअर्स सात टक्क्यांनी घसरले. ही निफ्टी फिफ्टीतील सर्वात मोठी घसरण आहे. इंटरग्लोब एव्हिएशनचे शेअर्स युद्ध सुरू झाल्यापासून आतापर्यंत १६ टक्क्यांनी घसरले आहेत. निफ्टी फिफ्टीत सोमवारी प्रामुख्याने वाहन उद्योग, वित्तीय सेवा आणि माध्यम समुहांशी संबंधित कंपन्यांच्या शेअरमध्ये तीन टक्क्यांपेक्षा जास्त घसरण झाली.