काव्या मारन यांच्या मालकीच्या सनरायजर्स लीड्स या टीमनं इंग्लंड येथे होणाऱ्या द हंड्रेड २०२६ च्या ऑक्शनमध्ये पाकिस्तान क्रिकेट संघाचा फिरकीपटू अबरार अहमद याला संघात घेतल्याने एकच खळबळ उडाली आहे. द हंड्रेडमध्ये आयपीएलशी संबंधित संघांच्या फ्रँचायजीकडून पाकिस्तानी खेळाडूंवर बोली लावली जाणार नसल्याची चर्चा होती. परंतु, प्रत्यक्षात तसं घडलेलं नाही. त्यामुळे काव्या मारन आणि सनरायजर्स लीड्सवर सोशल मीडियावर प्रचंड संताप व्यक्त केला जात आहे. तसेच आयपीएलमधील काव्या मारनच्या सनरायझर्स हैदराबाद संघाला आयपीएलमधून काढून टाका, अशी मागणी देखील करण्यात येत आहे.
या प्रकरणावर आता बीसीसीआयचे उपाध्यक्ष राजीव शुक्ला यांनी बीसीसीआयच्या वतीने पहिली प्रतिक्रिया दिली आहे. या प्रकरणात बीसीसीआय हस्तक्षेप करू शकत नाही, असं त्यांनी सांगितलं आहे.
काय म्हणाले राजीव शुक्ला ?
राजीव शुक्ला यांनी सांगितले की हा करार आयपीएलशी संबंधित नसून परदेशातील लीगशी संबंधित आहे. त्यामुळे त्या फ्रँचायझीनेच याबाबत निर्णय घ्यावा लागेल. “हे आमच्या कार्यक्षेत्रात येत नाही. हा परदेशी लीगचा विषय आहे, त्यामुळे आम्ही काही करू शकत नाही,” असे त्यांनी सांगितले.
लंडनमध्ये झालेल्या लिलावात सनरायझर्स लीड्सने अबरार अहमदला १,९०,००० पौंड (सुमारे २.५५ लाख डॉलर) इतक्या रकमेत खरेदी केले. त्यामुळे भारतीय मालकीच्या संघाकडून ‘द हंड्रेड’मध्ये करार मिळवणारा तो पहिला पाकिस्तानी खेळाडू ठरला आहे.
१२ मार्च रोजी पार पडलेल्या ‘द हंड्रेड’च्या लिलावादरम्यान, ‘सनरायझर्स लीड्स’ने ‘ट्रेंट रॉकेट्स’ संघावर मात करत, अबरार अहमदला तब्बल १,९०,००० पौंडांच्या (सुमारे २.३४ कोटी रुपये) मोठ्या रकमेला आपल्या संघात सामील करून घेतले. मात्र, या निर्णयामुळे सोशल मीडियावर एकच चर्चा आणि वाद सुरू झाला; कारण अबरार अहमदने यापूर्वी अनेकदा सोशल मीडियावर भारताविषयी आक्षेपार्ह विधाने केल्याचे आरोप समोर आले होते.
याचा परिणाम म्हणून, काही चाहत्यांनी सोशल मीडियावर जाऊन आयपीएलमधील संघ असलेल्या ‘सनरायझर्स हैदराबाद’वर बहिष्कार टाकण्याची मागणी केली. या संपूर्ण वादानंतर, ‘सनरायझर्स लीड्स’च्या अधिकृत ‘X’ खात्याबाबत एक महत्त्वाची बातमी समोर आली.
आज १३ मार्च रोजी असे निदर्शनास आले की, या संघाचे ‘X’ खाते अचानक निलंबित (suspended) करण्यात आले आहे. खाते उघडण्याचा प्रयत्न केल्यानंतर, “हे खाते निलंबित करण्यात आले आहे. ‘असा संदेश दिसत आहे. 'X’ च्या नियमांचे उल्लंघन करणाऱ्या खात्यांना निलंबित केले जाते.” मात्र, नेमक्या कोणत्या विशिष्ट नियमाचे उल्लंघन झाल्यामुळे हे खाते निलंबित करण्यात आले आहे, हे अद्याप स्पष्ट झालेले नाही.
दरम्यान, ‘सन ग्रुप’ने गेल्या वर्षीच ‘द हंड्रेड’ स्पर्धेतील ‘लीड्स’ संघाचे संपूर्ण मालकी हक्क संपादन केले होते. हे हक्क मिळण्यापूर्वी, हा संघ ‘नॉर्दर्न सुपरचार्जर्स’ या नावाने ओळखला जात असे. ‘सन ग्रुप’ने ‘इंग्लंड आणि वेल्स क्रिकेट बोर्डाकडून’ (ECB) ४९ टक्के आणि ‘यॉर्कशायर काउंटी क्रिकेट क्लबकडून’ उर्वरित ५१ टक्के हिस्सा खरेदी करून, या संघावर (फ्रँचायझीवर) पूर्ण नियंत्रण मिळवले होते.
संघाचे मुख्य प्रशिक्षक डॅनियल व्हेटोरी यांनी स्पष्ट केले की, अबरारचा संघात समावेश करण्याचा निर्णय हा अनेक ऑस्ट्रेलियन खेळाडूंशी चर्चा केल्यानंतरच घेण्यात आला होता. पाकिस्तानी खेळाडूंना संघात घ्यायचे की नाही, यावर चर्चा करण्यासाठी लिलावापूर्वी फ्रँचायझीमध्ये कोणतीही विशिष्ट बैठक झाली नव्हती.