अभिनेता शाहरुख खानचा मन्नत बंगला हा जगप्रसिद्ध असून हा बंगला पाहण्यासाठी अनेकजण उत्सुकतेनं येतात. मात्र, गेल्या काही दिवसांपासून शाहरुखचा मन्नत बंगला अडचणीत सापडला होता. या बंगल्याच्या बांधकामात सीआरझेड नियमांचं उल्लंघन केल्याची तक्रार दाखल करण्यात आली होती. पण, आता शाहरुख खानला याबाबत दिलासा मिळाला असून मन्नत बंगल्याच्या विस्ताराला सीआरझेड अर्थात किनारी क्षेत्र व्यवस्थापन प्राधिकरणाकडून १९४ व्या बैठकीत ग्रीन सिग्नल मिळाला आहे.
काही महिन्यांपूर्वी शाहरुखच्या मन्नत बंगल्याच्या बांधकामावर नियमांचं उल्लंघन केल्याबाबत आक्षेप घेण्यात आला होता. मन्नत बंगल्याच्या बांधकामावेळी सीआरझेडच्या नियमांचं उल्लंघन केल्याप्रकरणी तक्रार दाखल करण्यात आली होती. मात्र, आता सीआरझेडकडून ग्रीन सिग्नल मिळाल्यामुळे मन्नत या बंगल्याच्या परिसरात दोन तळमजले, पहिल्या ते सहाव्या मजल्यापर्यंत बांधकाम करण्यात येणार आहे.
शाहरुखच्या मन्नत बंगल्याचे क्षेत्रफळ सुमारे २४४६.४० चौरस मीटर असून या भूखंडावर एकूण बांधकाम ४५५३.४४ चौरस मीटरपर्यंत वाढवण्यात येणार आहे. यापैकी एफएसआय क्षेत्र ३०२९.२० चौरस मीटर आहे. तर, उर्वरित भाग नॉन- एफएसआय स्वरुपामध्ये असून या नवीन सुधारणेमुळे जवळपास ५९६ चौरस मीटर अतिरिक्त बांधकाम करण्यात येणार आहे.