- होर्मुझची सामुद्रधुनी सुरक्षित करण्यासाठी अमेरिकेचे अनेक देशांना आवाहन
अमेरिका–इस्रायल–इराण संघर्षाचा आज १६वा दिवस असून होर्मुझ सामुद्रधुनी खुली आणि सुरक्षित ठेवण्यासाठी बलाढ्य अमेरिकेला आता इतर देशांच्या मदतीची गरज भासते आहे. अमेरिकेने चीन, जपान, दक्षिण कोरिया आणि ब्रिटन यांसारख्या देशांकडून मदतीची अपेक्षा केली आहे.
सर्व देशांनी एकत्रित प्रयत्न करणे गरजेचे : डोनाल्ड ट्रम्प
ट्रम्प यांनी सांगितले की होर्मुझ सामुद्रधुनीतून मोठ्या प्रमाणात जागतिक व्यापार आणि ऊर्जा पुरवठा होतो. त्यामुळे या सागरी मार्गाच्या सुरक्षिततेसाठी सर्व संबंधित देशांनी एकत्रित प्रयत्न करणे गरजेचे आहे. त्यांनी असा दावाही केला की अलीकडील हल्ल्यांनंतर इराणची लष्करी क्षमता मोठ्या प्रमाणात कमी झाली आहे. मात्र ड्रोन, समुद्री खाणी आणि कमी पल्ल्याच्या क्षेपणास्त्रांमुळे अद्याप धोका कायम असल्याचे त्यांनी नमूद केले.
दरम्यान, या संघर्षाच्या पार्श्वभूमीवर इंधन वाहतुकीवर परिणाम होण्याची शक्यता व्यक्त केली जात आहे. होर्मुझ सामुद्रधुनी हा जगातील कच्च्या तेलाच्या व्यापारासाठी अत्यंत महत्त्वाचा मार्ग असून जागतिक तेल वाहतुकीपैकी सुमारे २० टक्के पुरवठा याच मार्गातून होतो. दुसरीकडे, इराणने मित्रदेशांना आश्वासन देत या सामुद्रधुनीत अडथळा निर्माण करण्याचा कोणताही हेतू नसल्याचे सांगितले आहे.
याचदरम्यान एलपीजी वाहून नेणारी दोन भारतीय जहाजे सुरक्षितपणे होर्मुझ सामुद्रधुनी पार करून भारताकडे रवाना झाली आहेत. जहाजवाहतूक आणि जलमार्ग मंत्रालयाचे विशेष सचिव राजेश कुमार सिन्हा यांनी दिलेल्या माहितीनुसार, भारतीय ध्वजांकित एलपीजी वाहक शिवालिक आणि नंदा देवी यांनी शनिवारी हा मार्ग पार केला. ही दोन्ही जहाजे मिळून सुमारे ९२,७०० टन एलपीजी घेऊन भारतात येत आहेत.