पुणे : पुण्यातील कोथरूड परिसरात तरुणाच्या मृत्यूची धक्कादायक घटना उघडकीस आली आहे. एका अल्पवयीन मुलीशी संपर्क असल्याच्या कारणावरून 23 वर्षीय तरुणाला मारहाण करण्यात आल्याचा आरोप असून या घटनेमुळे परिसरात तणावाचे वातावरण निर्माण झाले आहे.
मिळालेल्या माहितीनुसार, नागेश जाधव आणि संबंधित मुलगी यांच्यात पूर्वीपासून मैत्री होती. मात्र या मैत्रीला मुलीच्या कुटुंबीयांचा विरोध असल्याचे सांगितले जाते. नागेश हा पुण्यात शिवाजीनगर परिसरातील एका खासगी कंपनीत ऑफिस बॉय म्हणून काम करत होता, तर त्याची आई घरकाम करून कुटुंबाचा उदरनिर्वाह करत होती.
या प्रकरणात नागेशच्या आईने पोलिसांकडे तक्रार देत गंभीर आरोप केले आहेत. त्यांच्या म्हणण्यानुसार, 14 तारखेला संबंधित मुलीने नागेशला फोन करून भेटण्यासाठी बोलावले होते. तो तिला भेटण्यासाठी गेला असता तेथे आधीपासून उपस्थित असलेल्या काही जणांनी त्याला अडवून मारहाण केल्याचा आरोप करण्यात आला आहे.
नागेशला बेदम मारहाण करण्यात आल्यानंतर रात्री उशिरा त्याच्या आईला फोन करून शिवीगाळ करत मुलाला घेऊन जाण्याची धमकी देण्यात आल्याचेही त्यांनी तक्रारीत नमूद केले आहे.
दरम्यान, घटनेची माहिती मिळताच कोथरूड पोलिसांनी घटनास्थळी भेट देत पंचनामा केला असून या प्रकरणाचा तपास सुरू केला आहे. नेमक्या कोणत्या कारणामुळे ही घटना घडली आणि त्यामागे आणखी काही कारणे आहेत का, याचा शोध पोलिसांकडून घेतला जात आहे.