बेलापूर : बेलापूर विधानसभा मतदारसंघाच्या भाजप आमदार मंदा म्हात्रे हृदयविकाराचा झटका आल्यामुळे नवी मुंबई येथील अपोलो रुग्णालयात दाखल झाल्या आहेत. डॉक्टरांनी यशस्वी शस्त्रक्रिया करून दोन स्टेंट बसवले असून आमदार मंदा म्हात्रे यांच्या प्रकृतीत सुधारणा होत आहे. मंदा म्हात्रे यांचे पुत्र निलेश म्हात्रे यांनी प्रसारमाध्यमांच्या प्रतिनिधींनी तब्येतीबाबतची ताजी माहिती दिली आहे.
आमदार मंदा म्हात्रे रुग्णालयात असल्याचे कळताच उपमुख्यमंत्री शिंदे यांनी मोबाईलवरून मंदा म्हात्रे यांच्या मुलाशी बातचीत केली. मंदा म्हात्रे यांच्या तब्येतीची विचारपूस केली.
मंदा म्हात्रे या नवी मुंबईतील एक सक्रिय व प्रभावी नेतृत्व म्हणून ओळखल्या जातात. बेलापूर मतदारसंघातून त्या विधानसभेत प्रतिनिधित्व करत असून, स्थानिक प्रश्नांवर सातत्याने आवाज उठवणाऱ्या आमदार म्हणून त्यांची प्रतिमा आहे. पाणीपुरवठा, पायाभूत सुविधा, महिला सक्षमीकरण आणि मच्छीमार समाजातील प्रश्नांवर त्यांनी विशेष लक्ष केंद्रित केले आहे. नवी मुंबईतील अनेक सामाजिक कार्यक्रम, शासकीय योजना आणि स्थानिक पातळीवरील विकासकामांमध्ये त्यांचा सक्रिय सहभाग असतो. बेलापूर आणि आसपासच्या भागातील नागरी सुविधांच्या उभारणीत त्यांनी पुढाकार घेतला आहे.