नुकताच काही दिवसांपूर्वी बॉलीवूडचा प्रसिद्ध गायक बादशाहला बिष्नोई गँगकडून जीवे मारण्याची धमकी देण्यात आली होती. त्यानंतर आता आणखी एका प्रसिद्ध गायकला जीवे मारण्याची धमकी देण्यात आली आहे. पंजाबी गायक आणि अभिनेता गिप्पी ग्रेवालला परत एकदा अशी धमकी मिळाल्याने एकच खळबळ उडाली आहे. सध्या सोशल मीडियावर एक कथित ऑडिओ कॉल व्हायरल होत आहे. त्यामध्ये स्वतःला गँगस्टर गोल्डी बराड असल्याचं सांगणारा व्यक्ती गिप्पी ग्रेवालला थेट धमकी देत आहे. या घटनेनंतर चाहते आणि मनोरंजन क्षेत्रात मोठी चर्चा सुरू असल्याचं पाहायला मिळत आहे.
सोशल मिडियावर व्हायरल होत असलेल्या या ऑडिओ क्लिपमध्ये मोहालीचा उल्लेख करत पंजाबी गायक गिप्पी ग्रेवालला गंभीर परिणाम भोगावे लागतील, अशी थेट धमकी देण्यात आली आहे. मात्र, अद्याप या व्हायरल ऑडिओ क्लिपची अधिकृत पुष्टी पंजाब पोलिसांनी केलेली नाही. तसेच या प्रकरणात पोलिसांकडे कोणतीही अधिकृत तक्रार दाखल झाली नाही.
याआधीही गायक गिप्पी ग्रेवालला अशा प्रकारच्या धमक्या मिळाल्या असून तो सध्या कॅनडातील व्हॅन्कुव्हर शहरामध्ये असलेल्या व्हाईट रॉक या ठिकाणी राहतो. गायक गिप्पी ग्रेवालच्या घरावर गेल्या वर्षी नोव्हेंबरमध्येही गोळीबार झाला.
तसेच, या व्हायरल ऑडिओ क्लिपनंतर पुन्हा एकदा गिप्पी ग्रेवालच्या सुरक्षेबाबत चिंता व्यक्त केली जात असून पोलिसांकडून या संपूर्ण प्रकरणाची चौकशी सुरू आहे.