नवी दिल्ली : भारतीय ग्रँडमास्टर कोनेरू हम्पी या महिन्यात सायप्रसमध्ये होणाऱ्या प्रतिष्ठित कॅन्डिडेट्स स्पर्धेत सहभागी होणार नाही. पश्चिम आशियातील सुरू असलेल्या संघर्षाच्या पार्श्वभूमीवर यजमान देशातील सुरक्षा परिस्थितीबद्दल तिने चिंता व्यक्त केली होती. आता तिने स्पर्धेतून माघार घेण्याचा निर्णय घेतला आहे. हम्पीने 'एक्स' या सोशल मीडिया प्लॅटफॉर्मवर ही घोषणा केली. तिने लिहिले, "खूप विचारविनिमय केल्यानंतर, मी फिडे महिला कॅन्डिडेट्स स्पर्धेतून माघार घेण्याचा कठीण निर्णय घेतला आहे."
पश्चिम आशियातील तणावामुळे हम्पीला तिच्या सुरक्षेची चिंता वाटत होती. बतिने 'एक्स' वर लिहिले, "मला माहित आहे की मी एकटी कदाचित काहीही बदलू शकत नाही. पण मी कॅन्डिडेट्समध्ये खेळले किंवा नाही, तरी मला जे वाटते ते व्यक्त करणे महत्त्वाचे आहे असे मला वाटते." तिने पुढे लिहिले, "ज्या सर्वांनी पाठिंबा दर्शवला आहे, त्या सर्वांची मी आभारी आहे. ज्यांना या परिस्थितीची संवेदनशीलता समजत नसेल, त्यांच्यासाठी मी एवढेच सांगेन."
जागतिक अजिंक्यपदाच्या विजेतेपदासाठी आव्हान देणारे खेळाडू निश्चित करणारी कॅन्डिडेट्स स्पर्धा २८ मार्च रोजी सुरू होणार आहे. पुरुषांचे विजेतेपद भारताच्या डी. गुकेश यांच्याकडे, तर महिलांचे विजेतेपद चीनच्या जू वेनजुन यांच्याकडे आहे.
बुद्धिबळाची जागतिक नियामक संस्था असलेल्या फिडेचे (FIDE) मुख्य कार्यकारी अधिकारी, एमिल सुटोव्स्की यांनी या चिंता फेटाळून लावल्या आणि सांगितले की, स्थळ बदलण्याची गरज भासेल असे काहीही धोकादायक नाही. सुटोव्स्की म्हणाले, "आमच्या योजना बदललेल्या नाहीत. आम्ही कॅन्डिडेट्स स्पर्धेच्या तयारीच्या अंतिम टप्प्यात आहोत. अर्थातच, आम्ही परिस्थितीवर लक्ष ठेवून आहोत. सायप्रस युद्धक्षेत्र किंवा संघर्षक्षेत्रापासून फार दूर नाही, पण त्याच वेळी ते कोणत्याही प्रकारे थेट त्यात सामील नाही आणि युद्धजन्य परिस्थितीतही नाही." सायप्रस हे भूमध्य समुद्रातील तिसरे सर्वात मोठे बेट असून ते तुर्कस्तानच्या दक्षिणेस वसलेले आहे. ते युरोपियन युनियनचे सदस्य आहे.