पेशावर : पाकिस्तानमधील खैबर पख्तुनख्वा प्रांताची राजधानी असलेल्या पेशावरमध्ये कोहाट रोडवरील नॅशनल बँकेच्या शाखेतून चोरट्यांनी १३.७ लाख रुपयांची रोख रक्कम आणि २.१० कोटी रुपयांपेक्षा जास्त किमतीचे दागिने चोरले. बँकेच्या सिक्युरिटी लॉकरमधून चोरट्यांनी दागिने चोरले. डॉन या पाकिस्तानमधील वृत्तपत्राने या संदर्भातले वृत्त दिले आहे.
रात्रीच्या वेळी संरक्षणासाठी कोहाट रोडवरील नॅशनल बँकेच्या शाखेसाठी सुरक्षा रक्षकाची नेमणूक झालेली नाही. यामुळे रात्री पकडले जाण्याचा धोका कमी आहे हे लक्षात आल्यानंतर चोरट्यांनी परिसर निर्मनुष्य होण्याची वाट बघितली आणि संधी साधली. बँकेचे धातूचे शटर आणि कुंपण तसेच सिक्युरिटी लॉकर तोडण्यासाठी चोरट्यांनी गॅस कटर, हातोडा, पक्कड या साधनांचा वापर केला. चोरट्यांनी लॉकर तोडून ४०० तोळं सोनं चोरलं. या सोन्याची किंमत २.१० कोटी रुपयांपेक्षा जास्त आहे.
संशयितांना ओळखण्यासाठी आणि अटक करण्यासाठी बँकेच्या आजूबाजूच्या इमारतींमध्ये लावलेल्या सीसीटीव्ही कॅमेऱ्यांमधील आणि शहरातील 'सेफ सिटी प्रोजेक्ट'मधील फुटेज तापसण्याचे काम सुरू असल्याचे स्थानिक पोलिसांनी सांगितले.
बँकेवरचा दरोडा हा पेशावरमधील १५ दिवसांपेक्षा कमी काळातील दुसरा मोठा बँक दरोडा आहे. यापूर्वी ६ मार्च रोजी, पोलिसांनी पीरबला भागातील एका खासगी बँकेतील दरोड्याचा प्रयत्न हाणून पाडला होता. त्यानंतर झालेल्या चकमकीत तीन अधिकारी जखमी झाले. एका पोलीस अधिकाऱ्याचा नंतर उपचारादरम्यान मृत्यू झाला.
