सिलिंडर वादावर मंगलप्रभात लोढांचे विरोधकांना प्रत्युत्तर
मुंबई : मलबार हिलमधील १६ जैन मंदिरांना उत्सवासाठी प्रत्येकी पाच गॅस सिलिंडर उपलब्ध करून देण्याची विनंती करणारे पत्र मंत्री मंगलप्रभात लोढा यांनी राज्य सरकारला लिहिल्यानंतर, विरोधकांनी त्यावर आक्षेप घेत टीकासत्र सुरू केले. मंत्री लोढा यांनी या टीकेला प्रत्युत्तर दिले असून, "हिंदू सणांच्या वेळी आणि धार्मिक कार्यक्रमांच्या आयोजनावर टीका करणे ही सध्या राजकारणात एक फॅशन झाली आहे," अशा शब्दांत संताप व्यक्त केला आहे. माझ्यावर होणारी टीका हा 'नॅरेटिव्ह'चा भाग आहे. परंतु, लोकप्रतिनिधी म्हणून भाविकांची सोय करणे हे माझे कर्तव्यच असल्याचे त्यांनी स्पष्ट केले.
आपल्या भूमिकेचे समर्थन करताना लोढा म्हणाले की, "माझ्या मतदारसंघात रामनवमी, साई भंडारा किंवा जैन धर्माचे कार्यक्रम हे विशेष धार्मिक उत्सव असतात. या काळात गॅसचा पुरेसा साठा नसल्यास विशेष प्रयत्न करणे गरजेचे असते. माझ्याकडे साई भंडाऱ्याचे आयोजक आणि जैन धर्मीय लोक मदतीसाठी आले होते. अशा वेळी त्यांना सिलिंडर मिळवून देण्यासाठी प्रयत्न करणे चुकीचे आहे का? आगामी काळात २ एप्रिलला हनुमान जयंती आणि १४ एप्रिलला डॉ. बाबासाहेब आंबेडकर यांची जयंती आहे. या कार्यक्रमांसाठीही विशेष प्रयत्न करावेच लागतील, कारण ती आमदार म्हणून माझी जबाबदारी आहे", असेही त्यांनी सांगितले.
राज्यात गॅसचा तुटवडा नाही आणि सरकार उत्तम काम करत आहे. केवळ मोठ्या धार्मिक कार्यक्रमांच्या वेळी तात्कालिक गरज पूर्ण करण्यासाठी प्रशासकीय स्तरावर प्रयत्न करावे लागतात. अशा विषयांवरून विनाकारण तेढ निर्माण करणे थांबवावे, असा सल्लाही त्यांनी विरोधकांना दिला. कोणाला वाद निर्माण करायचा असेल तर त्यांनी खुशाल करावा, पण मी माझ्या जबाबदारीपासून पळ काढणार नाही, असेही लोढा म्हणाले.