Pandharpur News : पंढरपुरात पोलिसांची मोठी कारवाई; ५ लाखांच्या कारसह ४ किलो गांजा जप्त

पंढरपूर : पंढरपूर शहरात पोलिसांनी अमली पदार्थ विरोधी मोहिमेअंतर्गत मोठी कारवाई केली आहे. शहराच्या मध्यवर्ती भागात असलेल्या सरगम चौक परिसरात एका कारमधून तब्बल ३ किलो ९०० ग्रॅम गांजा जप्त करण्यात आला असून, कारचालकाला पोलिसांनी ताब्यात घेतले आहे.

नेमकी घटना काय?

शहरातील सरगम चौक परिसरातून एक कार अत्यंत भरधाव वेगाने जात असताना पोलिसांच्या नजरेस पडली. संशय आल्याने पोलिसांनी तातडीने या कारचा पाठलाग सुरू केला. दरम्यान, सरगम चौकात झालेल्या वाहतूक कोंडीमुळे संशयित कारला थांबावे लागले. याचा फायदा घेत पोलिसांनी कारची झडती घेतली असता, त्यात सुमारे ४ किलो गांजा सापडला. ३ किलो ९०० ग्रॅम (किंमत सुमारे ७९ हजार रुपये) गांजा सापडला तर ज्या कारणे घेऊन चाललेले कार ५ लाख किमतीची होती. पोलिसांनी सुमारे ५ लाख ७९ हजारांचा मुद्देमाल जप्त केला आहे. या प्रकरणी पोलिसांनी कारचालक माणिक चौगुले याला ताब्यात घेतले आहे. ही धडक कारवाई पंढरपूर पोलिसांच्या वतीने करण्यात आली असून, "शहरातील अवैध धंद्यांविरुद्ध अशीच कडक मोहीम सुरू राहील," अशी माहिती सहाय्यक पोलीस अधीक्षक प्रशांत डगळे यांनी दिली.