नाशिक : भोंदूबाबा अशोक खरात आणि रुपाली चाकणकर तसेच खरात आणि चाकणकरांची बहीण यांच्यात अनेकदा फोन कॉल झाल्याचा आरोप उबाठाच्या सुषमा अंधारे यांनी केला आहे.
फसवणूक करून महिलांवर अत्याचार करणे, समोरच्या व्यक्तीच्या श्रद्धेचा गैरफायदा घेणे, राजकीय लागेबांधे यांचा वापर करून कायदे धाब्यावर बसवणे, गरज पडल्यास दहशत बसवून पैसे उकळणे हे प्रकार अशोक खरात करत होता का ? करत असल्यास कसे आणि कोणकोणत्या प्रकरणात हे घडले आहे याची सविस्तर माहिती जाणून घेण्यासाठी पोलिसांचा तपास सुरू आहे. अशोक खरात आणि चाकणकर भगिनी यांच्यातील लागेबांधे याचाही तपास सुरू आहे. पोलिसांचे विशेष तपास पथक अर्थात एसआयटी चौकशी करत आहे.
महिलांचे लैंगिक शोषण, जादूटोणा, आर्थिक फसवणूक, दमदाटी आणि धमकी आदी प्रकरणांमध्ये अशोक खरात विरोधात नाशिक आणि अहिल्यानगरमध्ये पोलिसांत अनेक गुन्हे नोंदविण्यात आले आहेत. सध्या अशोक खरातला एका प्रकरणात न्यायालयीन आणि दुसऱ्या प्रकरणात पोलीस कोठडी झाली आहे. एसआयटीचे अधिकारी खरातची चौकशी करत आहेत. रुपाली चाकणकर आणि अशोक खरात यांच्यात १७७ फोन कॉल झाले. दोघांमध्ये ३३ हजारांपेक्षा जास्त सेकंदांसाठी बोलणे झाले आहे, असा आरोप सुषमा अंधारे यांनी केला आहे. रुपाली चाकणकर यांची बहीण प्रतिभा यांच्याशीही अशोक खरातचे २३६ फोन कॉल झाल्याचा आरोप सुषमा अंधारे यांनी केला आहे. या प्रकरणातही तपास सुरू आहे.