शिरूर : आईच्या प्रेमाला कलंक लावणारी एक अतिशय संतापजनक घटना शिरूर तालुक्यातील भांबर्डे येथे उघडकीस आली आहे. एका निष्ठुर मातेने आपल्या केवळ ११ महिन्यांच्या चिमुकल्याचा बळी घेतल्याने संपूर्ण जिल्हा हादरला आहे. पूजा रवींद्र पवार असे या आरोपी महिलेचे नाव असून, तिने स्वतःच्या स्वार्थापोटी 'यश' नावाच्या आपल्या निष्पाप मुलाची निर्घृण हत्या केली. केवळ हत्या करूनच ही माता थांबली नाही, तर गुन्ह्याचा पुरावा नष्ट करण्यासाठी तिने चिमुकल्याचा मृतदेह जवळच असलेल्या एका विहिरीत फेकून दिला. आईच्या कुशीत सुरक्षित वाटणाऱ्या यशचा अशा प्रकारे अंत झाल्याचे समजताच परिसरातून तीव्र संताप व्यक्त होत आहे. पोलिसांनी या प्रकरणी गुन्हा दाखल केला असून या क्रूर कृत्यामागचे नेमके कारण काय होते, याचा तपास सुरू केला आहे.
दुसरं लग्न करायचंय, मुलगा नकोय' ...
पोलिसांनी केलेल्या कसून चौकशीत आरोपी पूजा पवार हिने आपला गुन्हा कबूल केला. "मला दुसरे लग्न करायचे होते, पण लहान मुलगा सोबत असेल तर लग्न होण्यात अडचणी येतील," अशा अत्यंत विकृत आणि निष्ठुर विचारातून तिने यशला संपवण्याचा कट रचल्याची कबुली दिली आहे. एका मातेच्या स्वार्थापायी निष्पाप जीवाचा अंत झाल्याने तपास करणाऱ्या पोलीस अधिकाऱ्यांनीही तीव्र संताप व्यक्त केला आहे. कोकणातील मुरुड येथून फिरून आल्यानंतर मुलगा यश सतत रडत होता. याचा राग मनात धरून तिने हे अमानुष पाऊल उचलले.
पुरावा नष्ट करण्यासाठी मातेचा भयंकर कट
पोटच्या गोळ्याची हत्या करणाऱ्या आईला बेड्या
सुरुवातीला मुलगा बेपत्ता असल्याचे नाटक करणाऱ्या आणि अपघाताचा बनाव रचणाऱ्या पूजा पवार या मातेचा बुरखा अखेर पोलिसांनी फाडला आहे. वडील रवींद्र अशोक पवार यांनी रांजणगाव एमआयडीसी पोलीस ठाण्यात दिलेल्या तक्रारीनंतर पोलिसांनी संशयावरून पूजाची चौकशी केली. सुरुवातीला उडवाउडवीची उत्तरे देणाऱ्या पूजाने पोलिसांच्या कडक तपासणीसमोर गुडघे टेकले आणि आपल्या पोटच्या गोळ्याची निर्घृण हत्या केल्याची धक्कादायक कबुली दिली. पोलिसांनी तातडीने कारवाई करत शेतातील विहिरीतून ११ महिन्यांच्या यशचा मृतदेह बाहेर काढला असून तो उत्तरीय तपासणीसाठी (Post-mortem) पाठवण्यात आला आहे. आपल्याच मुलाचा जीव घेऊन गुन्हा लपवण्याचा प्रयत्न करणाऱ्या या महिलेला पोलिसांनी जेरबंद केले आहे. या घटनेमुळे भांबर्डे गावासह संपूर्ण शिरूर तालुका हादरला असून, एका निष्पाप जिवाचा बळी घेणाऱ्या या मातेला कठोर फाशीची शिक्षा व्हावी, अशी संतप्त मागणी नागरिकांकडून केली जात आहे. पोलीस या प्रकरणाचा अधिक सखोल तपास करत आहेत.