डोंबिवली : स्टंटबाजी आणि रिल्सच्या नादात स्वतःसह इतरांचा जीव धोक्यात घालणाऱ्या तरुणांना आता पोलिसांचा दणका बसला आहे. ठाणे-डोंबिवलीला जोडणाऱ्या माणकोली उड्डाणपुलावर चक्क डोळे झाकून दुचाकी चालवण्याचा धक्कादायक प्रकार समोर आला असून, याप्रकरणी विष्णूनगर पोलिसांनी तीन तरुणांना अटक केली आहे. माणकोली उड्डाणपूल सध्या स्टंटबाजांचा अड्डा बनला असल्याचे चित्र आहे. व्हायरल झालेल्या व्हिडिओमध्ये एक तरुण भरधाव दुचाकी चालवत असताना, त्याच्या मागे बसलेल्या दुसऱ्या तरुणाने चक्क त्याचे दोन्ही डोळे हाताने झाकले आहेत. रस्ता दिसत नसतानाही केवळ सोशल मीडियावर प्रसिद्धी मिळवण्यासाठी हा तरुण बेधडकपणे गाडी चालवत असल्याचे पाहून नागरिकांनी तीव्र संताप व्यक्त केला. या स्टंटबाजीमुळे उड्डाणपुलावरून प्रवास करणाऱ्या इतर वाहनधारकांच्या जीवालाही मोठा धोका निर्माण झाला होता. या प्रकाराची दखल घेत विष्णूनगर पोलिसांनी तातडीने तपास चक्रे फिरवली आणि गणेश फोंडा रेड्डी, कबीर नेतकर आणि यश मालवणकर या २२ वर्षीय तरुणांना बेड्या ठोकल्या आहेत. रिल्सच्या वेडापायी कायद्याचे उल्लंघन करणाऱ्यांना पोलिसांनी या कारवाईतून कडक इशारा दिला आहे.
मोठागाव-माणकोली पूल बनतोय स्टंटबाजांचे रणांगण
समाजमाध्यमांवरील प्रसिद्धीच्या हव्यासापोटी तरुण पिढी कोणत्या थराला जाऊ शकते, याचा संतापजनक नमुना माणकोली उड्डाणपुलावर पाहायला मिळाला. वाहतूक पोलिसांनी अनेकदा दंडात्मक कारवाई करूनही स्टंटबाजांची दहशत कमी झालेली नाही. आता तर चक्क 'डोळे झाकून' भरधाव दुचाकी चालवण्याचा एक जीवघेणा व्हिडिओ समोर आला आहे. व्हायरल झालेल्या या व्हिडिओमध्ये एका दुचाकीवर तीन तरुण बसलेले दिसत आहेत. धक्कादायक बाब म्हणजे, दुचाकी चालवणाऱ्या तरुणाचे डोळे त्याच्या मागे बसलेल्या मित्राने दोन्ही हातांनी घट्ट झाकले आहेत. रस्ता दिसत नसतानाही हा चालक मोठ्या रहदारीच्या पुलावर बिनधास्तपणे गाडी पळवत आहे, तर मागे बसलेला तिसरा तरुण या संपूर्ण 'मृत्यूपंथा'चे चित्रीकरण करण्यात मग्न आहे. पुलावर इतर वाहनांची वर्दळ सुरू असतानाही, केवळ रिल्स बनवण्यासाठी स्वतःचा आणि इतरांचा जीव धोक्यात घालणाऱ्या या स्टंटबाजांविरोधात आता कडक कारवाईची मागणी होत आहे.