मुंबई : मराठी सिनेविश्वात सैराट, फॅन्ड्री, नाळ यांसारख्या सिनेमांमधून मातीतल्या वास्तववादी कथा प्रेक्षकांपर्यंत पोहोचवणारे दिग्दर्शक-निर्माते नागराज पोपटराव मंजुळे (Nagraj Manjule)आता ओटीटीवर नव्या अवतारात झळकणार आहेत. मटका किंग या वेबसिरीजच्या माध्यमातून नागराज मंजुळे पुन्हा एकदा एक दमदार कथानक घेऊन समोर आले आहेत. सध्या या वेब सिरीजची मनोरंजन विश्वात एकच चर्चा आहे. ओटीटीवर येणारी 'मटका किंग' (Matka King) ही वेब सिरीज केवळ एक गुन्हेगारी कथा नसून नागराज मंजुळे यांची ही नवी निर्मिती एका अशा जगात घेऊन जाते, जिथे ‘मटका’ हा फक्त जुगार नसून सत्ता, गणित, मानसशास्त्र आणि सामाजिक वास्तव यांचा गुंता आहे.
‘मटका किंग’ची कथा एका अशा काळात घडते, जेव्हा मटका हा फक्त खेळ नव्हता, तर अनेकांच्या आयुष्याचा केंद्रबिंदू होता. या जगात पैसा जितक्या वेगानं येतो, तितक्याच वेगानं माणसाला गिळतोही. मालिका या जगाच्या ग्लॅमरला फक्त पृष्ठभागावर ठेवत नाही, तर त्यामागचं काळं वास्तव उघड करत जाते. एक अशी दुनिया, जी कधीकाळी जगली गेली होती, आणि एक अशी व्यक्तिरेखा, जी निरीक्षण आणि अनुभवातून घडवली गेली, हे दोन्ही प्राइम व्हिडिओच्या “मटका किंग” मध्ये एकत्र येतात.
अभय कोराणे यांनी क्रिएट आणि लिहिलेली, तसेच नागराज पोपटराव मंजुळे यांनी क्रिएट, लिखित आणि दिग्दर्शित केलेल्या या मालिकेत विजय वर्मा, कृतिका कामरा, सई ताम्हणकर, सिद्धार्थ जाधव, भूपेंद्र जडावत आणि गुलशन ग्रोवर प्रमुख भूमिकांमध्ये आहेत. याबरोबरच भारत जाधव, गिरीश कुलकर्णी, जेमी लीव्हर, किशोर कदम, सायरस सहुकार, अर्पिता सेठिया, संभाजी तांगडे, इश्तियाक खान, संजीव जोटांगिया आणि सिमरन अश्विनी देखील महत्त्वाच्या भूमिकांमध्ये झळकणार आहेत.
येत्या १७ एप्रिल २०२६ रोजी Amazon Prime Video वर प्रदर्शित होणारी ही मालिका, मजबूत लेखन, वास्तववादी दिग्दर्शन आणि दमदार अभिनयामुळे या वर्षातील सर्वात चर्चेत राहणाऱ्या वेबसिरिजपैकी एक ठरू शकते. जर तुम्हाला वास्तववादी कथा आवडत असतील, तर ‘मटका किंग’ वेबसिरिज तुमच्यासाठी उत्तम ठरणार आहे.