मुंबई : मुंबईच्या छत्रपती शिवाजी महाराज आंतरराष्ट्रीय विमानतळावर महसूल गुप्तचर संचालनालयाने (DRI) मोठी कारवाई करत सोन्याच्या तस्करीचा पर्दाफाश केला आहे. सुमारे ३८ कोटी रुपयांचे जवळपास ३० किलो सोने तस्करीच्या मार्गाने आणताना २४ महिलांना अटक करण्यात आली आहे.
DRIची गुप्त कारवाई
गुप्त माहितीच्या आधारे DRIने विशेष मोहीम राबवत या महिलांना ताब्यात घेतले. ‘ऑपरेशन’ अंतर्गत केलेल्या कारवाईत एकूण २९.३७ किलो सोने जप्त करण्यात आले, ज्याची किंमत सुमारे ३७.७४ कोटी रुपये असल्याचे सांगितले जात आहे.
जप्त करण्यात आलेला माल
या कारवाईत २५.१० किलो सोन्याच्या लड्या आणि ४.२७ किलो सोन्याचे दागिने जप्त करण्यात आले. सर्व आरोपी महिलांना अटक करून पुढील कारवाई सुरू करण्यात आली आहे.
धक्कादायक माहिती समोर
तपासात धक्कादायक माहिती समोर आली असून, महिलांनी सोने अत्यंत कौशल्याने लपवले होते. काहींनी बुटांमध्ये, तर काहींनी कपड्यांच्या आत विशेष तयार केलेल्या पाऊचमध्ये सोने ठेवले होते. काही प्रकरणांमध्ये शरीरावर लपवण्याचे प्रकारही आढळले आहेत. या महिलांना सोने लपवण्याचे आणि तपास यंत्रणांची दिशाभूल करण्याचे प्रशिक्षण देण्यात आल्याचा संशय व्यक्त केला जात आहे. त्यामुळे ही कारवाई एका संघटित टोळीशी संबंधित असल्याचे प्राथमिक तपासात स्पष्ट होत आहे.
अटक करण्यात आलेल्या सर्व महिलांना न्यायालयात हजर केले जाणार असून, या प्रकरणातील मुख्य सूत्रधाराचा शोध घेण्यासाठी तपास यंत्रणांनी चौकशी अधिक तीव्र होणार आहे.