नागपूर : आयपीएलच्या (IPL) रणधुमाळीत नागपूर शहरात सट्टेबाजीचे जाळे वेगाने पसरल्याचे समोर आले आहे. प्रतापनगर पोलिसांनी आयटी पार्क परिसरातील एका फ्लॅटवर धाड टाकून तब्बल ४० लाख रुपयांची रोख रक्कम जप्त केली असून, या कारवाईमुळे सट्टा बाजारात मोठी खळबळ उडाली आहे. या प्रकरणाचे धागेदोरे थेट दुबईपर्यंत पोहोचले असल्याचे तपासात निष्पन्न झाले आहे.
नेमकी कारवाई काय?
अंबाझरी पोलीस स्टेशनच्या हद्दीतील एका फ्लॅटमध्ये ऑनलाइन अॅपच्या माध्यमातून आयपीएल सामन्यांवर सट्टा लावला जात असल्याची गुप्त माहिती पोलिसांना मिळाली होती. त्यानुसार पोलिसांनी सापळा रचून धाड टाकली. या कारवाईत ४० लाखांच्या रोकडसह सट्टेबाजीसाठी वापरले जाणारे साहित्य जप्त करण्यात आले आहे. या प्रकरणातील मुख्य आरोपी अमन पाठक याला गुन्हे शाखेने (Crime Branch) यापूर्वीच त्याच्या इतर साथीदारांसह अटक केली होती. अमन पाठकची कसून चौकशी केली असता, या संपूर्ण रॅकेटचा मास्टरमाइंड 'एस.के.' (S.K.) नावाचा इसम असल्याचे समोर आले आहे. 'एस.के.' च्या सूचनेनुसारच नागपुरात भाड्याने फ्लॅट घेऊन हे केंद्र चालवले जात होते. ऑनलाइन अॅपच्या माध्यमातून हा सर्व काळाबाजार सुरू होता.
दुबई कनेक्शन उघड
पोलिसांच्या प्राथमिक तपासात या रॅकेटचे कनेक्शन आंतरराष्ट्रीय स्तरावर असल्याचे स्पष्ट झाले आहे. दुबईतून या सट्टेबाजीच्या व्यवहारांचे नियंत्रण केले जात असल्याची धक्कादायक माहिती समोर आली आहे. यामुळे या प्रकरणात आता अंमलबजावणी संचालनालय (ED) किंवा इतर तपास यंत्रणांची मदत घेतली जाते का, याकडे सर्वांचे लक्ष लागले आहे.
पुढील तपास आणि पोलीस कोठडी
अमन पाठकची पोलीस कोठडी १५ एप्रिलपर्यंत वाढवण्यात आली आहे. पोलीस सध्या 'एस.के.'चा शोध घेत असून, त्याच्या अटकेनंतर सट्टेबाजीच्या या मोठ्या रॅकेटमधील आणखी काही बड्या नावांचा खुलासा होण्याची शक्यता वर्तवण्यात येत आहे.