नवी दिल्ली : दिल्ली कॅपिटल्सचा वेगवान गोलंदाज लुंगी एनगिडीने रुग्णालयातून डिस्चार्ज मिळाल्यानंतर आपली पहिली प्रतिक्रिया दिली. त्याने सोशल मीडियावर त्याच्यासाठी प्रार्थना करणाऱ्यांचे आभार मानले आणि आपली प्रकृती आता ठीक असल्याचे सांगितले.
दिल्ली कॅपिटल्स आणि पंजाब किंग्स यांच्यातील सामन्यादरम्यान दक्षिण आफ्रिकेचा गोलंदाज लुंगी एनगिडी जखमी झाला होता. ही घटना पंजाबच्या डावातील तिसऱ्या षटकात घडली. मिड-ऑफवरून धावत येऊन झेल घेण्याच्या प्रयत्नात एनगिडीचा तोल गेला आणि तो खाली पडला, ज्यामुळे त्याच्या डोक्याच्या मागच्या भागाला जमिनीवर आपटल्याने जोरात मार लागला. दुखापत इतकी गंभीर होती की, लगेच मैदानावर फिजिओथेरपिस्टला बोलवावे लागले. वैद्यकीय पथकाने खबरदारी म्हणून मानेला पट्टा (नेक ब्रेस) लावला आणि त्याला स्ट्रेचरवरून मैदानाबाहेर नेण्यात आले. त्यानंतर त्याला रुग्णवाहिकेने रुग्णालयात नेण्यात आले. सुदैवाने, उपचारादरम्यान तो शुद्धीवर होता आणि डॉक्टरांशी बोलत होता.
परिस्थितीचे गांभीर्य लक्षात घेऊन, दिल्ली वाहतूक पोलिसांनी स्टेडियमपासून रुग्णालयापर्यंत ग्रीन कॉरिडॉर तयार केला होता. प्रचंड वाहतूक कोंडी असूनही, एनगिडीला केवळ ११ मिनिटांत रुग्णालयात पोहोचवण्यात आले, ज्यामुळे त्याला वेळेवर उपचार मिळाले.
सामन्यादरम्यान दुखापत झाल्याने एनगिडीला रुग्णालयात दाखल करण्यात आले होते, पण आता त्याला डिस्चार्ज देण्यात आला आहे. पंजाब किंग्सविरुद्धच्या सामन्यादरम्यान त्याच्या डोक्याला आणि मानेच्या मागील भागाला दुखापत झाली होती आणि त्याला बीएलके-मॅक्स सुपर स्पेशालिटी रुग्णालयात नेण्यात आले होते. संघाच्या म्हणण्यानुसार, त्याची प्रकृती आता स्थिर असून सध्या कोणताही धोका नाही. डॉक्टरांनी त्याला काही काळ विश्रांती घेण्याचा सल्ला दिला आहे.