येवला : नगर-मनमाड महामार्गावरील (Nagar-Manmad highway) येवला तालुक्यातील गोपाळवाडी फाट्याजवळ आज मंगळवार दि ५ रोजी दुपारी दीड च्या सुमारास पेट्रोल आणि डिझेलने भरलेला एक टँकर उलटल्याची भीषण दुर्घटना घडली. या अपघातानंतर टँकरमधून मोठ्या प्रमाणावर इंधन गळती सुरू झाल्याने परिसरात 'हाय अलर्ट' जारी करण्यात आला होता. दरम्यान, महामार्ग पोलीस आणि येवला तालुका पोलिसांनी दाखवलेल्या प्रसंगावधानामुळे मोठी जीवितहानी व आगीचा मोठा अनर्थ टळला आहे.
पेट्रोल आणि डिझेलचा साठा घेऊन जाणारा हा टँकर गोपाळवाडी गावाच्या हद्दीत चालकाचे वाहनावरील नियंत्रण सुटले. नियंत्रण सुटल्याने हा टँकर रस्त्याच्या कडेला जाऊन जोरदार आदळला आणि पलटी झाला. टँकर पलटी होताच त्यातील पेट्रोल आणि डिझेल वेगाने रस्त्यावर वाहू लागले. (Petrol-diesel tanker overturned on Nagar-Manmad highway)
सध्या उन्हाळ्याचे दिवस असल्याने तापमान प्रचंड वाढलेले आहे. पेट्रोल आणि डिझेल हे अत्यंत ज्वलनशील पदार्थ असल्याने साध्या ठिणगीनेही मोठा स्फोट होण्याची शक्यता होती. इंधन गळतीमुळे परिसरात इंधनाचा उग्र वास पसरला होता. ही बाब अत्यंत गंभीर असल्याचे लक्षात येताच महामार्ग पोलिसांनी तातडीने हालचाली सुरू केल्या. आणि मोठा अनर्थ टळला.