SBI Bank Employee Strike: SBI च्या ग्राहकांसाठी महत्त्वाची माहिती आहे. स्टेट बँक ऑफ इंडियानं त्यांच्या ग्राहकांना महत्त्वाची सूचना दिली आहे. बँकिंग संदर्भातील काही काम असेल तर त्यांच्यासाठी ही महत्त्वाची अपडेट आहे. बँकेचं कामकाच जवळपास चार दिवस ठप्प राहण्याची शक्यता आहे. बँकेचे कर्मचारी संपावर जाणार आहेत. SBI कर्मचारी संघटनांनी दोन दिवसांच्या संपाची घोषणा केली आहे. त्यामुळे दोन दिवसांचा संप आणि दोन दिवसांच्या सुट्ट्या, अशाप्रकारे सलग चार दिवस बँका बंद राहणार आहेत. त्यामुळेच, ग्राहकांनी बँकेशी संबंधित कामे तात्काळ करून घेणे आवश्यक आहे.
सलग ४ दिवस बँका बंद
AISBISF (ऑल इंडिया स्टेट बँक ऑफ इंडिया स्टाफ फेडरेशन) ने दिलेल्या माहितीनुसार, २५ आणि २६ मे रोजी SBI कर्मचारी संपावर जाणार आहेत. हा संप दोन दिवसांचा असला तरी प्रत्यक्षात ग्राहकांना चार दिवस बँकिंग सेवांचा फटका बसू शकतो. २३ मे रोजी चौथा शनिवार आहे त्यामुळे कर्मचाऱ्यांना सुट्टी असणार आहे. २4 मे रोजी रविवार आहे. तर २५ मे आणि २६ मे रोजी कर्मचाऱ्यांनी संप पुकारला आहे त्यामुळे या दोन दिवस देखील बँका बंद राहण्याची शक्यता आहे. एकूणच ४ दिवस सलग बँका बंद राहण्याची शक्यता असल्याने ग्राहकांनी बँकेशी संबंधित कामे तात्काळ करून घेणे आवश्यक आहे.
कर्मचाऱ्यांनी संप का पुकारला ?
AISBISF च्या म्हणण्यानुसार, कर्मचाऱ्यांच्या प्रलंबित मागण्यांकडे दीर्घकाळ दुर्लक्ष करण्यात आल्याने हा संप पुकारण्यात आला आहे. कर्मचाऱ्यांनी खालील मुद्द्यांवर नाराजी व्यक्त केली आहे:
बँकेत कर्मचाऱ्यांची कमतरता
नोकरीच्या अटी व नियमांबाबत समस्या
भरती प्रक्रियेतील अडचणी
पेन्शनसंबंधित प्रश्न
पूर्वी झालेल्या करारांची अंमलबजावणी न होणे
फेडरेशनने २ मे रोजी SBI चे अध्यक्षांना नोटीस देत हा संप Industrial Disputes Act, 1947 अंतर्गत करण्यात येणार असल्याचे स्पष्ट केले आहे.
कोणत्या सेवा बंद राहणार ?
कर्मचाऱ्यांनी संप केल्यानं बँकेच्या शाखा असल्या तरी ऑनलाईन सेवांवर परिणाम होणार नाही. मात्र यामुळं शाखेतील कामं होऊ शकणार नाहीत. चेक जमा करणे, रोख रक्कम जमा करणे, पासबुक अपडेट आणि शाखेतून होणारे इतर व्यवहार होऊ शकणार नाहीत.
ग्राहकांनी रोख व्यवहार, चेक क्लिअरन्स किंवा शाखेत जाऊन कराव्या लागणाऱ्या कामांचे नियोजन आधीच करून ठेवावे. विशेषतः व्यावसायिक आणि व्यापाऱ्यांनी व्यवहारांमध्ये अडथळा येऊ नये यासाठी आवश्यक ती खबरदारी घेण्याचे आवाहन करण्यात आले आहे.