IPL 2026 : आयपीएलमध्ये आज राजीव गांधी स्टेडियमवर टेबल टॉपर्संची लढत होणार आहे. हंगामातील ४९ वा सामना पंजाब विरुद्ध हैदराबाद असा होणार आहे. पंजाबचा विजयरथ थांबला आहे, त्यांना पुन्हा विजयी मार्गावर यायचं आहे. यंदाच्या हंगामात या दोन्ही संघाने चांगली कामगिरी केली आहे. यामुळे हा सामना चाहत्यांसाठी रोमांचक ठरणार आहे.
हे दोन्ही संघ आतापर्यंत या हंगामात सहा-सहा सामने जिंकले आहेत. पंजाबने ९ सामन्यांत ६ सामने जिंकत १३ गुणांसह गुणतालिकेत पहिले स्थान फटकावले आहे. यात त्यांचा एक सामना पावसामुळे वाया गेला, तर २ सामन्यांत त्यांचा पराभव झाले आहेत. हैदराबादने आपल्या स्फोटक फलंदाजीने यंदाच्या हंगामात ६ सामने जिंकले आहेत, तर ३ सामन्यांत त्यांना पराभव पतकरावे लागले आहे. हैदराबाद १२ गुणांसह दुसऱ्या स्थानावर आहे. यामुळे हा सामना दोन्ही संघांसाठी अव्वल स्थान पक्के करण्यासाठी महत्त्वाचा ठरणार आहे.
हेड टु हेड रेकॉर्ड
आयपीएलमध्ये या दोन्ही संघात आतापर्यंत २५ सामने झाले आहेत. यात हैदराबादने पंजाबवर हुकूमत केली आहे. हैदराबादने १७ सामने जिंकले आहेत, तर पंजाबला ७ सामन्यांत विजय मिळाला आहे. हैदराबादला घरच्या खेळपट्टीवर मोठे यश मिळवता आले आहे, ११ सामन्यांत हैदराबादने ९ सामने जिंकले आहेत, तर पंजाबने २ सामने.
कशी असेल खेळपट्टी ?
खेळपट्टी साधारणपणे फलंदाजांना अनुकूल मानली जाते. येथे चेंडू बॅटवर सहज येत असल्यामुळे मुक्त फटकेबाजी आणि मोठ्या धावसंख्येला वाव मिळतो. मात्र, शिस्तबद्ध मारा करत दिशा आणि टप्पा राखल्यास गोलंदाजही यश मिळवू शकतात. येथे झालेली मागील लढत दुपारी साडेतीनची होती, त्यामुळे खेळपट्टीचा नूर वेगळा होता. संध्याकाळी साडेसातपासून रंगणाऱ्या सामन्यात परिस्थिती वेगळी असेल. दवाचा परिणाम निर्णायक ठरू शकतो, ज्यामुळे दुसऱ्या डावात फलंदाजी अधिक सोपी होण्याची शक्यता आहे. हवामानाचा अंदाजानुसार सामन्याच्या वेळी मेघगर्जनेसह पावसाची शक्यता आहे.