मुंबई : ‘स्वयंभू’चा टीझर प्रदर्शित झाल्यापासून या चित्रपटाची प्रेक्षकांमध्ये प्रचंड उत्सुकता निर्माण झाली आहे. विशेषतः ‘कार्तिकेय २’च्या (Karthikeya 2) मोठ्या यशानंतर अभिनेता निखिल सिद्धार्थचा हा चित्रपट त्याच्या करिअरमधील सर्वाधिक प्रतिक्षित प्रोजेक्ट्सपैकी एक मानला जात आहे. भव्य स्केल, दमदार अॅक्शन आणि सिनेमॅटिक व्हिज्युअल्सने सजलेल्या या टीझरने चाहत्यांचं लक्ष वेधून घेतलं आहे. त्यातच नुकतंच रिलीज झालेलं ‘रा रा धीवरा’ हे गाणंही सोशल मीडियावर आणि प्रेक्षकांमध्ये चांगलंच लोकप्रिय ठरत आहे.
‘स्वयंभू’ हा केवळ एक ऐतिहासिक किंवा अॅक्शनपट नसून अत्यंत मोठ्या प्रमाणावर उभारलेला मेगा प्रोजेक्ट आहे. त्यामुळे या चित्रपटासाठी निर्मात्यांनी आणि दिग्दर्शकांनी प्रत्यक्ष दुर्गम जंगलांमध्ये जाऊन शूटिंग करण्याचा निर्णय घेतला. या अनुभवाबद्दल बोलताना दिग्दर्शक भरत कृष्णमाचारी यांनी अनेक रंजक खुलासे केले.
भरत कृष्णमाचारी म्हणाले, “चित्रपटातील लाईव्ह-अॅक्शन सीक्वेन्ससाठी आम्ही आंध्र प्रदेशातील राजामुंद्रीजवळ असलेल्या मारेडुमिल्ली जंगलांची निवड केली होती. विशेष म्हणजे, हाच तो परिसर आहे जिथे ‘पुष्पा’ (Pushpa) चित्रपटातील अनेक जंगलातील सीन्स शूट करण्यात आले होते. मात्र आम्हाला त्याच लोकेशन्सवर शूट करायचं नव्हतं. आम्ही अशा नैसर्गिक जागा शोधल्या जिथे याआधी कधीच शूटिंग झालं नव्हतं.”
ते पुढे म्हणाले, “त्या ठिकाणी पोहोचणं हेच आमच्यासाठी एखाद्या अॅडव्हेंचरसारखं होतं. डोंगराच्या माथ्यावर पोहोचण्यासाठी आम्हाला जवळपास २ ते २.५ तास जीपमधून प्रवास करावा लागत होता. एका शूटिंग शेड्यूलदरम्यान अचानक मुसळधार पाऊस सुरू झाला आणि आमच्या टीममधील काही सदस्य आवश्यक सामानाशिवाय जवळपास दोन दिवस डोंगरावर अडकून पडले होते. त्या परिस्थितीत शूटिंग करणं खरंच खूप आव्हानात्मक होतं.”
याशिवाय त्यांनी आणखी एक खास गोष्ट सांगितली. “त्या सुंदर आणि पूर्णपणे अनस्पर्शित लोकेशनवर शूटिंग करण्यासाठी परवानगी मिळवणाऱ्या पहिल्या काही टीम्समध्ये आमच्या टीमचा समावेश होता. त्यामुळे आम्हाला त्या ठिकाणचा नैसर्गिक आणि भव्य अनुभव कॅमेऱ्यात टिपता आला,” असंही त्यांनी नमूद केलं.
‘स्वयंभू’चा टीझर भारताच्या गौरवशाली सुवर्णयुगाची झलक दाखवतो. वारसा, परंपरा, शौर्य आणि सांस्कृतिक वैभव यांचा संगम या कथेमध्ये दिसून येतो. विशेषतः ‘सेंगोल’सारख्या प्रतीकात्मक घटकांमुळे चित्रपटाला ऐतिहासिक आणि भावनिक वजन प्राप्त झालं आहे. टीझरमध्ये निखिल सिद्धार्थ अत्यंत दमदार आणि प्रभावी लूकमध्ये दिसत असून त्यांच्या भूमिकेची झलक चाहत्यांना खूपच आवडली आहे. भव्य दृश्यरचना, गडद नाट्य आणि थरारक अॅक्शन सीक्वेन्समुळे चित्रपटाबद्दलची उत्सुकता आणखी वाढली आहे.
विशेष म्हणजे, या चित्रपटाचं शूटिंग तब्बल १७० दिवस चाललं. त्यामुळे ‘स्वयंभू’ हा अलीकडच्या काळातील सर्वाधिक महत्त्वाकांक्षी आणि भव्य भारतीय चित्रपटांपैकी एक मानला जात आहे.
‘स्वयंभू’ची निर्मिती भुवन आणि श्रीकर यांनी पिक्सल स्टुडिओजच्या बॅनरखाली केली आहे. भारताच्या समृद्ध इतिहासाला, सांस्कृतिक वारशाला आणि शाश्वत गौरवाला समर्पित असलेला हा भव्य चित्रपट समर २०२६ मध्ये जगभरातील प्रेक्षकांच्या भेटीला येणार आहे.