CSK : ऋतुराज गायकवाडच्या नेतृत्वात सीएसकेने हंगामाची सुरुवात सलग तीन पराभवाने केली होती. मात्र संघाने हळूहळू लय पकडली आहे. सीएसकेने आतापर्यंत ११ पैकी सहा सामने जिंकले आहेत आणि १२ गुणांसह गुणतालिकेत पाचव्या स्थानावर आहेत. प्लेऑफला पात्र होण्यासाठी संघाला उर्वरित तीन सामन्यांपैकी दोन सामने जिंकावे लागतील. या महत्त्वाच्या टप्प्यावर सीएसकेला मोठा धक्का बसला आहे. संघातील स्टार खेळाडू दुखापतीमुळे बाद झाला आहे. तो उर्वरित सामने खेळण्याची शक्यता मावळली आहे. फ्रँचायजीने बुधवारी (१३ मे) रात्री सोशल मीडियावरून जाहीर केले की, अष्टपैलू खेळाडू जेमी ओव्हरटन मांडीला दुखापत झाल्याने घरी रवाना झाला आहे. फ्रँचायझीने सांगितले की ओव्हरटन आयपीएल २०२६ च्या उर्वरित सामन्यांमधून अधिकृतपणे वगळले आहे.
जेमी ओव्हरटनची कामगिरी
सीएसकेसाठी जेमी ओव्हरटन यंदाच्या हंगामात चांगली कामगिरी करत होता. लखनऊ विरुद्धच्या सामन्यात त्याने चार षटकांत ३६ धावा देत तीन विकेट्स घेतल्या होत्या. त्याच्या प्रयत्नांमुळे लखनऊला २०३ धावांवर रोखण्यात सीएसके यशस्वी झाली होती. धावांचा पाठलाग करताना सीएसकेने शेवटच्या षटकांत लक्ष्य पूर्ण केले. जेमी ओव्हरटनने यंदाच्या हंगामात सीएसकेसाठी १० सामन्यांमध्ये १७.७८ च्या सरासरीने गोलंदाजी करत १४ विकेट्स घेतल्या आहेत, तसेच १५२ च्या स्ट्राइक रेटने १३६ धावा केल्या आहेत.
सीएसकेची डोकेदुखी
सीएसकेचे अनेक खेळाडू दुखापतीमुळे यंदाच्या हंगामातून बाहेर झाले आहेत. यंदाच्या हंगामात सीएसकेसाठी ही सर्वात मोठी डोकेदुखी झाली आहे. नुकताच संघाने दुखापतग्रसत खेळाडू रामकृष्ण घोषच्या जागी कर्नाटकाच्या अष्टपैलू मॅकनील नोरोन्हा याला संघात सामील केले आहे. तसेच संघासाठी धोनीने अद्याप एकही सामना खेळलेला नाही. हंगामाच्या सुरुवातीलाच वेगवान गोलंदाज नॅथन एलिस हंगामातून बाहेर झाला होता, आणि आता उजव्या मांडीच्या दुखापतीमुळे ओव्हरटन बाहेर झाला आहे.
आयपीएल २०२६ मधून बाहेर झालेले सीएसकेचे खेळाडू-
नॅथन एलिस
खलील अहमद
आयुष म्हात्रे
रामकृष्ण घोष