धरमशाला : आयपीएल २०२६ मधील ५८ व्या सामन्यात मुंबई इंडियन्सने पंजाब किंग्सचा त्यांच्याच घरच्या मैदानावर ६ गडी राखून पराभव केला. पंजाबने दिलेले २०१ धावांचे विशाल आव्हान मुंबईने १९.५ षटकांत ४ गडी गमावून पूर्ण केले. मुंबईच्या या विजयाचा महानायक ठरला तिलक वर्मा, ज्याने अवघ्या ३३ चेंडूंत नाबाद ७५ धावांची तुफानी खेळी करत सामना शेवटच्या षटकात फिरवला. या पराभवामुळे पंजाब किंग्जच्या प्लेऑफच्या आशांना मोठा धक्का बसला आहे.
पॉवरप्लेमध्ये मुंबईची भक्कम सुरुवात
धावांचा पाठलाग करताना इम्पॅक्ट प्लेअर म्हणून आलेल्या रोहित शर्मा (२५ धावा) आणि रायन रिकल्टन यांनी मुंबईला ५९ धावांची बिनबाद सुरुवात करून दिली. रिकल्टनने अवघ्या २३ चेंडूंत ४ चौकार आणि ४ षटकारांसह ४८ धावांची स्फोटक खेळी केली. नमन धीर (९) आणि रोहित शर्मा स्वस्तात बाद झाल्यानंतर मुंबईची स्थिती ३ बाद ८८ अशी झाली होती. अवघ्या ८८ धावांवर ३ विकेट्स गेल्यानंतर सामना पंजाबच्या बाजूने झुकला होता, पण तिलक वर्माने सामन्याचे चित्र पालटले. तिलकने अवघ्या २५ चेंडूंत आपले अर्धशतक पूर्ण केले. त्याने ३३ चेंडूंत ६ चौकार आणि ६ षटकारांच्या मदतीने नाबाद ७५ धावांची मॅचविनिंग खेळी केली. तर शेरफेन रदरफोर्ड (२०) बाद झाल्यानंतर विल्स जॅक मैदानात आला. जॅकने अवघ्या १० चेंडूंत २ चौकार आणि २ षटकारांसह नाबाद २५ धावा कुटल्या. त्याने १९व्या षटकाच्या पाचव्या चेंडूवर (१९.५ षटक) चौकार मारत मुंबईला १ चेंडू राखून थरारक विजय मिळवून दिला.
पंजाबची अपयशी खेळी
पंजाबला सलग चार सामन्यांत पराभव पत्करावा लागला, तरीही त्यांच्या कामगिरीत काही सुधारणा पाहायला मिळाली नाही. पंजाब किंग्सच्या इम्पॅक्ट खेळाडूने म्हणजेच विष्णू विनोदने अवघ्या ८ चेंडूंत नाबाद १५ धावा केल्या. त्याच्या या छोट्या आणि महत्त्वपूर्ण खेळीमध्ये १ चौकार आणि १ षटकार समाविष्ट होता, ज्याच्या जोरावर पंजाबच्या संघाने २०० धावांचा टप्पा गाठला. मुंबईच्या गोलंदाजांसमोर त्यांना अपेक्षित आक्रमक सुरुवात करताच आली नाही. प्रियांश आर्य ( २२) व प्रभसिमरन सिंग ही जोडी ५.३ षटके खेळूनही ५० धावा करू शकली. तर गोलंदाजीतही पंजाब किंग्जकडून अझमतुल्लाह ओमरझाईने ३६ धावांत २ बळी घेतले, तर युझवेंद्र चहलने किफायतशीर गोलंदाजी करत ३२ धावांत १ बळी (रोहित शर्माला क्लीन बोल्ड) मिळवला. मात्र, मार्को जानसेन (४ षटकांत ५५ धावा) आणि झेवियर बार्टलेट (३.५ षटकांत ५३ धावा) हे प्रचंड महागडे ठरले, ज्याचा फायदा मुंबईच्या फलंदाजांनी घेतला.
सामन्याचा संक्षिप्त धावफलक:
पंजाब किंग्ज: २० षटकांत २००/८ (प्रभसिमरन ५७, ओमरझाई ३८; शार्दुल ठाकूर ४/३९, दीपक चहर २/३६)
मुंबई इंडियन्स: १९.५ षटकांत २०५/४ (तिलक वर्मा नाबाद ७५, रायन रिकल्टन ४८, विल्स जॅक नाबाद २५; ओमरझाई २/३६)