चेन्नई : आयपीएलच्या १९ व्या हंगामात प्लेऑफमध्ये कोणते संघ पोहोचणार याकडे सर्व क्रिकेटप्रेमींचे लक्ष लागले आहे. आयपीएल २०२६चा हंगाम अंतिम टप्प्याकडे जात असताना चेन्नई सुपर किंग्स आणि रॉयल चॅलेंजर्स बंगळुरु या दोन्ही संघांमध्ये मोठे बदल झाले आहेत.चेन्नईने दुखापतग्रस्त खलील अहमद याच्या जागी वेगवान गोलंदाज कुलदीप यादवला संघात सामील केले आहे. तर गतविजेत्या आरसीबीने नुवान तुषाराच्या जागी इंग्लंडचा वेगवान गोलंदाज रिचर्ड ग्लेसन याला संघात घेतले आहे.
चेन्नईच्या संघात कुलदीप यादवची एन्ट्री
सीएसकेने खलील अहमदच्या जागी कुलदीप यादवला ३० लाख रुपयांमध्ये संघात घेतले आहे. कुलदीप यादवने यापूर्वी राजस्थान रॉयल्स कडून २०२१ मध्ये आयपीएल पदार्पण केले होते. आतापर्यंत त्याने आयपीएलमध्ये ३ सामने खेळले असून त्यात २ विकेट घेतल्या आहेत.
आरसीबीमध्ये रिचर्ड ग्लीसन
इंग्लंडचा वेगवान गोलंदाज रिचर्ड ग्लीसनला रॉयल चॅलेंजर्स बंगळुरुने नुवान तुषाराच्या जागी संघात घेतले आहे. ग्लीसनने आयपीएलमध्ये आतापर्यंत २ सामने खेळले असून त्याच्या नावावर २ विकेट आहेत. बंगळुरूने त्याला १.६ कोटी रुपयांत संघात घेतले आहे.ग्लीसनने आंतरराष्ट्रीय स्तरावरही इंग्लंडसाठी ६ टी-२० सामने खेळले असून ९ विकेट घेतल्या आहेत. त्याची सर्वोत्तम कामगिरी १५ धावांत ३ विकेट अशी आहे. ग्लीसन आतापर्यंत १४५ टी-२० सामने खेळला आहे. त्यात त्याने १७० विकेट्स घेतल्या आहेत. टी- २० करियरमध्ये ५/३३ ही त्याची आतापर्यंतची सर्वोत्तम कामगिरी आहे.