आयपीएल रणसंग्राम - सुशील परब
आययपीएल २०२६ मध्ये रॉयल चॅलेंजर्स बंगळूरु आणि पंजाब किंग्स यांच्यातील ६१ वा सामना १७ मे रोजी हिमाचल प्रदेश क्रिकेट असोसिएशन स्टेडियम, धर्मशाला येथे दुपारी ३.३० वाजल्यापासून खेळवला जाणार आहे. प्लेऑफच्या शर्यतीत टिकून राहण्यासाठी आणि स्थान पक्के करण्यासाठी बंगळूरु संघासाठी हा सामना अत्यंत महत्त्वाचा आहे. दुसरीकडे, सलग पराभवांमुळे श्रेयस अय्यरच्या नेतृत्वाखालील पंजाब किंग्सचे आव्हान कठीण झाले आहे. पीबीकेएसने आपले शेवटचे सलग पाच सामने गमावले असून, त्यांच्यासाठी विजयाच्या मार्गावर परतणे अत्यावश्यक असेल. पंजाब किंग्सचे उर्वरित सामने ‘डू ऑर डाय’ (करो किंवा मरो) स्थितीत आहेत. गुणतालिकेत सध्या ते १३ गुणांसह (६ विजय) चौथ्या स्थानावर असले तरी, प्ले-ऑफचे तिकीट नक्की करण्यासाठी त्यांना दोन्ही सामने (रॉयल चॅलेंजर्स बंगळूरु आणि लखनऊ सुपर जायंट्स) जिंकावेच लागतील. एकही पराभव त्यांना प्लेऑफच्या शर्यतीतून बाहेर करू शकतो. दोन्ही सामने गमावल्यास संघ प्लेऑफच्या शर्यतीतून पूर्णपणे बाहेर पडेल. हा सामना पंजाबसाठी अंतिम फेरीसारखाच असणार आहे, कारण आरसीबीचा संघ (१६ गुणांसह अव्वल स्थानावर) हा सामना जिंकून आपले स्थान पूर्णपणे निश्चित करण्यासाठी मैदानात उतरेल. पंजाब किंग्सला बाद फेरी गाठायची असेल, तर त्यांना फलंदाजी आणि गोलंदाजी दोन्ही विभागांत पुनरागमन करून सलग सामने जिंकावे लागतील. प्रभसिमरन सिंह व प्रियांश आर्या यांच्याकडून चांगल्या खेळीची अपेक्षा आहे. त्यांना श्रेयस अय्यर, कूपर कोनोली, सूर्यांश शेडगे, शशांक सिंग, मार्कस स्टॉयनिस, मार्को जेन्सन यांची साथ मिळेल. पंजाबची गोलंदाजी मार्कस स्टॉयनिस, मार्को जेन्सन, अर्शदीप सिंग, यश ठाकूर, यांच्यावर अवलंबून असेल. विराट कोहली सध्या जबरदस्त फॉर्ममध्ये असून त्याने मागील सामन्यात नाबाद शतक १०५ धावा केल्या होत्या. त्याला जेकब बेथल, रजत पाटीदार आणि देवदत्त पडिक्कल, कुणाल पांड्या यांची भक्कम साथ मिळत आहे, तर आरसीबीची गोलंदाजी अनुभवी भुवनेश्वर कुमार आणि जोश हेझलवूड, जेकब डफी, कृणाल पांड्या यांच्या खांद्यावर असेल. सर्वात महत्त्वाचे म्हणजे, पंजाब किंग्ज सलग सहाव्या पराभवाचा धोका टाळणार का? हे पाहण्यासाठी संपूर्ण क्रिकेट विश्व उत्सुक आहे.