मध्य प्रदेश : आपले घर आणि घराचे अंगण हे मुलांसाठी सर्वात सुरक्षित ठिकाण असते, असा प्रत्येक पालकाचा ठाम विश्वास असतो. मात्र, याच सुरक्षित मानल्या जाणाऱ्या अंगणात उभ्या असलेल्या एका कारने अवघ्या चार वर्षांच्या चिमुकलीचा निष्पाप बळी घेतल्याची अतिशय धक्कादायक घटना समोर आली आहे. मध्य प्रदेशातील इंदूर शहरात घडलेल्या या घटनेने सर्वांचेच डोळे पाणावले आहेत. खेळण्याच्या नादात हाती लागलेली कारची चावी एका लहानग्या जीवासाठी मृत्यूचे दार उघडेल, याची पुसटशीही कल्पना तिच्या कुटुंबीयांना नव्हती.
निरागस खेळ आणि ती एक मोठी चूक
ही काळीज पिळवटून टाकणारी घटना इंदूरच्या जूनी परिसरातील नंदनवन कॉलनीत घडली. साबीर हुसेन आणि त्यांचा मुलगा (चिमुकलीचे वडील) हे लोखंडाचा आणि ट्रक वर्कशॉपचा व्यवसाय करतात. हुसेन कुटुंबातील सर्वात लहान आणि सर्वांची लाडकी असलेली ४ वर्षांची 'बेबी हाजरा' सोमवारी नेहमीप्रमाणे घराच्या आवारात खेळण्यात मग्न होती. खेळता-खेळता अचानक तिला तिच्या आजोबांच्या कारची चावी सापडली. कुतूहलापोटी ती निरागस चिमुकली गाडीजवळ गेली, तिने गाडीचे दार उघडले आणि ती थेट आत जाऊन बसली. तिची हीच कृती तिच्या आयुष्याची शेवटची चूक ठरली.
ऑक्सिजनसाठी २ तास जीवघेणी धडपड
गाडीत प्रवेश केल्यानंतर हाजरा मागच्या सीटवर जाऊन बसली. मात्र, आजकालच्या आधुनिक कारचे दरवाजे आणि खिडक्या सेंट्रल लॉकिंग सिस्टीमवर असल्याने, ती आत बसताच काही क्षणांत गाडी चारही बाजूंनी लॉक झाली. बाहेर कडकडीत ऊन असल्याने बंदिस्त कारमधील तापमान अक्षरशः भट्टीसारखे तापू लागले. खिडक्या पूर्णपणे बंद असल्यामुळे गाडीतील ऑक्सिजनची पातळी वेगाने खालावली. तब्बल दोन तास ती चिमुकली त्या तापलेल्या गाडीतून बाहेर पडण्यासाठी आणि एक श्वास घेण्यासाठी जिवाच्या आकांताने धडपडत होती. दुसरीकडे, आपली लेक अचानक कुठे गायब झाली म्हणून कुटुंबीयांची जिवापाड शोधाशोध सुरू होती. पण त्यांची लाडकी घरासमोरच एका बंदिस्त लोखंडी पेटीत मृत्यूशी झुंज देत आहे, हे कोणाच्याच ध्यानीमनी नव्हते.
दोन तासांनी उलगडला दुर्दैवी थरार
गल्लीत आणि शेजारी सर्वत्र शोध घेतल्यानंतर तब्बल दोन तासांनी कुटुंबीयांचे लक्ष अंगणात उभ्या असलेल्या कारकडे गेले. गाडीजवळ जाऊन खिडकीतून आत पाहिले असता कुटुंबाच्या पायाखालची जमीनच सरकली. हाजरा गाडीच्या मागच्या सीटवर निपचित आणि बेशुद्धावस्थेत पडली होती. तातडीने गाडीचे दरवाजे उघडून तिला बाहेर काढण्यात आले आणि उपचारासाठी घाईघाईने जवळच्या रुग्णालयात नेण्यात आले. मात्र, नियतीच्या मनात काही वेगळेच होते; डॉक्टरांनी तपासून तिला मृत घोषित केले. या प्रकरणी पोलिसांनी अकस्मात मृत्यूची नोंद केली असून, जिल्हा रुग्णालयात शवविच्छेदन पार पडले. एका साध्याशा दुर्लक्षाने हसतेखेळते घर कायमचे उद्ध्वस्त झाल्याने संपूर्ण परिसरातून हळहळ व्यक्त केली जात आहे.