मुंबई : अभिनेता रितेश देशमुख (Riteish Deshmukh) याचा ड्रीम प्रोजेक्ट असलेल्या ‘राजा शिवाजी’ चित्रपटाने बॉक्स ऑफिसवर अक्षरशः धुमाकूळ घातला आहे. तिसऱ्या आठवड्यातही या चित्रपटाची घोडदौड कायम असून, प्रेक्षकांकडून मिळणाऱ्या भरघोस प्रतिसादामुळे कमाईचे आकडे दिवसेंदिवस वाढताना दिसत आहेत. ऐतिहासिक पार्श्वभूमी आणि दमदार सादरीकरणामुळे हा चित्रपट आता मराठी चित्रपटसृष्टीत नवा इतिहास रचण्याच्या उंबरठ्यावर पोहोचला आहे.
दर आठवड्याला अनेक नवीन चित्रपट थिएटरमध्ये प्रदर्शित होत असतात. मात्र, त्यातील फारच कमी चित्रपट प्रेक्षकांच्या मनावर दीर्घकाळ राज्य करू शकतात. सध्या हेच चित्र ‘राजा शिवाजी’च्या बाबतीत पाहायला मिळत आहे. मे महिन्याच्या पहिल्या दिवशी रिलीज झालेल्या या चित्रपटाने सुरुवातीपासूनच बॉक्स ऑफिसवर मजबूत पकड निर्माण केली. विशेष म्हणजे, मराठीसोबत हिंदी भाषेतही प्रदर्शित झालेल्या या चित्रपटाला देशभरातून मोठा प्रतिसाद मिळत आहे.
चित्रपट रिलीजपूर्वीच ‘राजा शिवाजी’ची जोरदार चर्चा रंगली होती. रितेश देशमुख (Riteish Deshmukh) याने या चित्रपटात प्रमुख भूमिका साकारण्यासोबतच दिग्दर्शनाची धुराही सांभाळली आहे. त्यामुळे प्रेक्षकांच्या अपेक्षा प्रचंड वाढल्या होत्या आणि थिएटरमध्ये प्रदर्शित झाल्यानंतर चित्रपट त्या अपेक्षांवर पूर्णपणे खरा उतरल्याचे दिसून आले. दमदार कथा, भव्यदिव्य सेट्स, युद्धदृश्ये आणि अभिनयामुळे प्रेक्षकांनी या चित्रपटाला अक्षरशः डोक्यावर घेतले आहे.
विशेष म्हणजे, ‘राजा शिवाजी’ने प्रदर्शनाच्या दुसऱ्याच आठवड्यात आपला संपूर्ण खर्च वसूल केला. त्यानंतरही चित्रपटाची कमाई सातत्याने सुरूच असून आता हा चित्रपट नफा कमावणाऱ्या यशस्वी चित्रपटांच्या यादीत सामील झाला आहे. तिसऱ्या आठवड्यातदेखील चित्रपटाची कमाई कोटींच्या घरात कायम आहे, त्यामुळे चित्रपटाची लोकप्रियता अजूनही तसूभरही कमी झालेली नाही, हे स्पष्ट होत आहे.
दरम्यान, ‘राजा शिवाजी’च्या कमाईबद्दल बोलायचे झाल्यास, चित्रपटाने पहिल्या आठवड्यात तब्बल ५२.६५ कोटी रुपयांची कमाई केली होती. त्यानंतर दुसऱ्या आठवड्यातही चित्रपटाने दमदार कामगिरी करत २४.३० कोटी रुपयांचा गल्ला जमवला.
आता सॅकनिल्कच्या अर्ली ट्रेंड रिपोर्टनुसार, १९ व्या दिवशी म्हणजेच तिसऱ्या मंगळवारी ‘राजा शिवाजी’ने आणखी १.३० कोटी रुपयांची कमाई केली आहे. यामुळे या चित्रपटाची भारतातील एकूण निव्वळ कमाई आता ८७ कोटी रुपयांवर पोहोचली आहे.
विशेष म्हणजे, भारतीय बॉक्स ऑफिसच्या इतिहासात आजपर्यंत कोणत्याही मराठी चित्रपटाने १०० कोटी रुपयांचा टप्पा पार केलेला नाही. त्यामुळे ‘राजा शिवाजी’समोर आता ऐतिहासिक संधी उभी आहे. हा बहुप्रतिक्षित टप्पा गाठण्यासाठी चित्रपटाला आणखी केवळ १३ कोटी रुपयांची गरज आहे. चौथ्या आठवड्यातही प्रेक्षकांचा असाच प्रतिसाद कायम राहिला, तर ‘राजा शिवाजी’ मराठी चित्रपटसृष्टीतील पहिला १०० कोटी क्लबमध्ये पोहोचणारा चित्रपट ठरू शकतो.