डोंबिवली : डोंबिवलीत स्वतःचा मोठा दबदबा असल्याचा आव आणत नामांकित बिल्डर, वकील आणि निवृत्त पोलीस अधिकाऱ्यांना कोट्यवधी रुपयांचा गंडा घालणाऱ्या एका भामट्याचा अखेर पर्दाफाश झाला आहे. बाऊन्सरची फौज आणि गनमॅन घेऊन फिरणारा निखिल भोईर याला विष्णुनगर पोलिसांनी अटक केली असून, त्याच्या फसवणुकीच्या रॅकेटमुळे अनेक धक्कादायक बाबी समोर आल्या आहेत. लोकांवर प्रभाव टाकून त्यांना मोठ्या कर्जाचे आमिष दाखवायचे आणि त्यानंतर लाखो-कोट्यवधी रुपयांची फसवणूक करायची, अशी त्याची कार्यपद्धती असल्याचे तपासात उघड झाले आहे.
या प्रकरणातील तक्रारदार असलेल्या एका नामांकित बिल्डरला १५ कोटी रुपयांच्या कर्जाची तातडीची गरज होती. त्यावेळी निखिल भोईर हा मोठमोठी कर्जे मंजूर करून देतो, अशी माहिती बिल्डरला त्याच्या मित्रामार्फत मिळाली. त्यानंतर बिल्डरने निखिलशी संपर्क साधला. निखिलनेही आपण सहज कर्ज मिळवून देऊ शकतो, असा विश्वास निर्माण केला. मात्र त्यासाठी सव्वा टक्के कमिशन आगाऊ द्यावे लागेल, अशी अट त्याने घातली.
तपासादरम्यान पोलिसांना समजले की, निखिल भोईर हा अतिशय नियोजनबद्ध पद्धतीने लोकांना जाळ्यात ओढत होता. स्वतःची प्रतिमा प्रभावशाली दाखवण्यासाठी तो कायम बाऊन्सरची मोठी टीम आणि एक गनमॅन सोबत घेऊन फिरत असे. त्याच्या या थाटामाटामुळे समोरच्या व्यक्तींना तो अत्यंत मोठा आणि प्रभावशाली व्यक्ती असल्याचा भास होत असे. त्यामुळे मोठमोठे व्यावसायिक, वकील आणि निवृत्त वरिष्ठ अधिकारीही त्याच्यावर सहज विश्वास ठेवत होते.
बिल्डरच्या तक्रारीनंतर विष्णुनगर पोलिसांनी या प्रकरणाचा सखोल तपास सुरू केला. तपासादरम्यान निखिल भोईर हा सराईत भामटा असल्याचे उघड झाले. त्याच्याविरोधात यापूर्वीच सहा गुन्हे दाखल असून, त्यापैकी चार गुन्हे फसवणुकीचे आहेत. पोलिसांनी सापळा रचत डोंबिवली पश्चिमेतील गुप्ते रोड परिसरातून त्याला ताब्यात घेतले. अटकेनंतर त्याच्याकडे चौकशी सुरू असून, उद्या त्याला कल्याण न्यायालयात हजर करण्यात येणार आहे.
निखिल भोईरने आतापर्यंत किती जणांना अशाच प्रकारे फसवले आहे, याचा तपास आता पोलीस करत आहेत. मोठ्या नावांचा वापर, बाऊन्सरचा गराडा आणि प्रभावशाली व्यक्तिमत्त्वाचा आव आणत त्याने कोट्यवधी रुपयांची माया जमवल्याचा संशय व्यक्त केला जात आहे. या अटकेनंतर डोंबिवलीतील अनेक व्यावसायिक आणि नामांकित व्यक्तींनी सुटकेचा निःश्वास सोडला असला, तरी या घटनेमुळे सर्वसामान्य नागरिकांपासून मोठ्या उद्योजकांपर्यंत प्रत्येकाने आर्थिक व्यवहार करताना अधिक सतर्क राहण्याची गरज अधोरेखित झाली आहे.