Yuzi Chahal : आयपीएल २०२६ च्या निर्णायक टप्प्यात पंजाब किंग्सचा स्टार फिरकीपटू युझवेंद्र चहल पुन्हा चर्चेत आला आहे. यावेळी निमित्त गोलंदाजी नाही, तर त्याने केलेला भावनिक खुलासा आहे. भारतीय महिला क्रिकेटपटू हरलीन देओलसोबत संवाद साधताना चहल आपल्या वैयक्तिक आयुष्याबद्दल मनमोकळेपणाने बोलला. दारू सोडल्यानंतर आयुष्य कसं बदललं, हे त्यानं सांगितलं. पंजाब किंग्सच्या अधिकृत यूट्यूब चॅनलवरील कँडिड विथ किंग्स या पॉडकास्टमध्ये हरलीनने चहलला थेट प्रश्न विचारला की, तू दारू पिणं सोडलंस ना? यावर चहलने दिलेलं उत्तर सध्या सोशल मीडियावर जोरदार व्हायरल होत आहे.
तो माझ्या आयुष्यातला सर्वोत्तम निर्णय
चहल म्हणाला, दारू आयुष्यातून काढून टाकल्यानंतर माझं आयुष्य पूर्णपणे बदललं. हा माझ्या आयुष्यातला सर्वोत्तम निर्णय होता. आता मी कुटुंब आणि मित्रांसोबत जास्त वेळ घालवतो. कोण खरंच माझ्यासोबत आहे आणि कोण नाही, हे मला आता स्पष्टपणे समजू लागलं आहे. तो पुढे म्हणाला, पूर्वी मी प्रत्येक गोष्टीचा खूप विचार करायचो. पण आता स्वतःवर जास्त लक्ष देतो. चहलने आपल्या मानसिक संघर्षाबद्दलही मोठा खुलासा केला. एक वेळ अशी आली होती की मी पूर्णपणे निराश झालो होतो. मानसिक स्थिती चांगली नव्हती. मला जाणवलं की दारू माझ्यासाठी योग्य नाही. त्यानंतर मी स्वत:च दारू सोडण्याचा निर्णय घेतला असं तो म्हणाला.
IPL मध्ये चहलची दमदार कामगिरी
IPL 2026 च्या मेगा लिलावात पंजाब किंग्सने चहलला तब्बल १८ कोटी रुपयांत संघात घेतलं होतं. यापूर्वी तो मुंबई इंडियन्स, रॉयल चॅलेंजर्स बंगळुरू आणि राजस्थान रॉयल्सकडून खेळला आहे. आतापर्यंत १८९ आयपीएल सामन्यांत चहलने २३१ विकेट्स घेतल्या आहेत. तो आयपीएल इतिहासातील सर्वात यशस्वी गोलंदाजांपैकी एक मानला जातो.