नवी मुंबई : सीवूड्स येथील एनआरआय वेटलँड परिसरात फ्लेमिंगोंच्या संरक्षणासाठी वन विभागाच्या मॅन्ग्रोव्ह सेलने विशेष पावले उचलली आहेत. फ्लेमिंगो पाहण्यासाठी आणि छायाचित्रणासाठी दररोज मोठ्या संख्येने पर्यटक येत असल्याने या संवेदनशील परिसंस्थेचे रक्षण करण्यासाठी परिसरात इशारा फलक लावण्यात आले आहेत. या फलकांवर पर्यटक आणि पक्षीप्रेमींसाठी ‘करावे आणि करू नयेत’ अशा सूचनांची स्पष्ट माहिती देण्यात आली आहे. ड्रोन उडवणे, तलावात प्रवेश करणे, पक्षांना खाद्य देणे, मोठा आवाज करणे, कचरा टाकणे, शिकार करणे आणि आग लावणे यास सक्त मनाई करण्यात आली आहे. नियमांचे उल्लंघन करणाऱ्यांवर वन्यजीव संरक्षण कायदा १९७२ च्या कलम ९ आणि ५१ अंतर्गत कारवाईचा इशाराही देण्यात आला आहे.
स्थानिक पक्षीप्रेमींनी सांगितले की, हा परिसर ‘नो-फ्लाय झोन’ घोषित करण्यात आला असून, मागील काही वर्षांत काही जणांनी फ्लेमिंगोंच्या थव्यांवर ड्रोन उडवल्याच्या घटना घडल्या होत्या. त्यामुळे पक्ष्यांमध्ये भीतीचे वातावरण निर्माण होत होते. यंदा डीपीएस आणि टीएस चाणक्य वेटलँडमध्ये फ्लेमिंगोंचे प्रमाण कमी असल्याने सीवूड्समधील एनआरआय वेटलँडकडे पर्यटकांचा ओघ वाढला आहे. दररोज सुमारे ५०० पर्यटक येथे फ्लेमिंगो पाहण्यासाठी आणि छायाचित्रणासाठी येत असल्याची माहिती समोर आली आहे.
पर्यावरण कार्यकर्ते आणि एनआरआय कॉम्प्लेक्सचे रहिवासी सुनील अग्रवाल यांनी वन विभागाच्या या उपक्रमाचे स्वागत केले. किनारी वेटलँड्स हे मॅन्ग्रोव्ह परिसंस्थेचाच विस्तार असल्याची भूमिका राज्याचे वनमंत्री गणेश नाईक यांनी घेतल्यानंतर वेटलँड संवर्धनाकडे प्रशासन अधिक गांभीर्याने पाहत असल्याचे त्यांनी नमूद केले. दरम्यान, मुंबई महानगर प्रदेशातील अनेक वेटलँड्सवर वाढत्या बांधकामांचा दबाव असल्याने या जैवविविधतेच्या अधिवासांचे संरक्षण करणे अत्यंत आवश्यक असल्याची मागणी पर्यावरणप्रेमींनी केली आहे.