ढाका (वृत्तसंस्था) :
पाकिस्तानविरुद्ध घरच्या मैदानावर २-० अशी कसोटी मालिका जिंकत शानदार कामगिरी करणाऱ्या बांगलादेशच्या खेळाडूंना आंतरराष्ट्रीय क्रिकेट परिषदेच्या नव्या क्रमवारीत मोठा फायदा झाला आहे.
अनुभवी फलंदाज मुशफिकुर रहीम यांनी मालिकेत सर्वाधिक २५९ धावा करत कसोटी फलंदाजी क्रमवारीत तब्बल दहा स्थानांची झेप घेत संयुक्त १६वे स्थान मिळवले. त्याचबरोबर लिटन दास यानेही २३९ धावांच्या जोरावर १४ स्थानांची प्रगती करत २४वे स्थान पटकावले.
कसोटी गोलंदाजीत डावखुरा फिरकीपटू तैजुल इस्लाम दोन स्थानांनी वर चढून ११व्या स्थानी पोहोचला असून त्याने कारकिर्दीतील सर्वोत्तम गुणांकनही मिळवले. मेहदी हसन मिराज याने २५वे स्थान मिळवले. अष्टपैलू खेळाडूंच्या क्रमवारीतही तैजुल इस्लामने तीन स्थानांची प्रगती करत २९वे स्थान मिळवले. मालिका गमावूनही पाकिस्तानसाठी एक सकारात्मक बाब म्हणजे वेगवान गोलंदाज खुर्रम शहजाद याने पुनरागमन करत कसोटी गोलंदाजी क्रमवारीत ४९वे स्थान मिळवले. दरम्यान, एकदिवसीय क्रिकेट क्रमवारीतही बदल पाहायला मिळाले. नेपाळचा यष्टीरक्षक फलंदाज आसिफ शेख पाच स्थानांनी वर चढला, तर अष्टपैलू दिपेंद्र सिंग ऐरी आठ स्थानांनी प्रगती करत संयुक्त ९१व्या स्थानी पोहोचला.