सिंधूचा जपानी खेळाडूवर एकहाती विजय; लक्ष्य सेनला वॉकओव्हर
सिंगापूर ओपन सुपर 750 बॅडमिंटन स्पर्धेत भारतीय खेळाडूंनी शानदार कामगिरी केली आहे. भारतीय खेळांडूनी चांगली कामगिरी करत उपांत्यपूर्व फेरीत धडक मारली आहे. दोन वेळा ऑलिम्पिक पदक विजेता पीव्ही सिंधू, स्टार शटलर लक्ष्य सेन तसेच पुरुष दुहेरीतील सात्विकसाईराज रंकीरेड्डी आणि चिराग शेट्टी या जोडीने दमदार विजय मिळवत पुढील फेरीत धडक मारली आहे. महिला एकेरीत पीव्ही सिंधूने जपानच्या रिको गुंजीचा अवघ्या दोन गेममध्ये 21-9, 21-12 असा सहज पराभव केला. सुरुवातीपासूनच सिंधूने सामन्यावर वर्चस्व राखला होता. तीने प्रतिस्पर्धीला कोणतीही संधी दिली नाही. मात्र, उपांत्यपूर्व फेरीत सिंधूसमोर मोठं आव्हान असणार आहे. तिचा सामना आता दक्षिण कोरियाच्या अव्वल मानांकित ॲन से यंगशी होणार आहे. हा सामना सिंधूसाठी महत्त्वाचा ठरणार आहे.
लक्ष्य सेनला नशिबाची साथ
पुरुष एकेरीत भारताचा स्टार खेळाडू लक्ष्य सेनला उपांत्यपूर्व फेरीत पोहोचण्यासाठी फारशी मेहनत घ्यावी लागली नाही. पॅरिस ऑलिम्पिक रौप्यपदक विजेता आणि थायलंडचा खेळाडू कुन्लावुत विटिडसर्न याने सामना सुरू झाल्यानंतर अवघ्या एका मिनिटात दुखापतीमुळे माघार घेतली. त्यामुळे लक्ष्य सेनला वॉकओव्हर मिळाला आणि थेट उपांत्यपूर्व फेरित स्थान मिळाला.आता उपांत्यपूर्व फेरीत लक्ष्य सेनचा सामना जपानच्या कोकी वातानाबेशी होणार आहे. जागतिक क्रमवारीत 19व्या स्थानावर असलेला वातानाबे चांगल्या फॉर्ममध्ये आहे. त्यामुळे हा सामना रंगतदार होण्याची शक्यता आहे.
सात्विक-चिरागची संघर्षपूर्ण जीत
भारताची स्टार पुरुष दुहेरी जोडी सात्विकसाईराज रंकीरेड्डी आणि चिराग शेट्टी यांना मात्र पुढील फेरी गाठण्यासाठी कडवी झुंज द्यावी लागली. त्यांनी चायनीज तैपेईच्या ली झी हुई आणि यांग पो सुआन या जोडीचा 21-15, 11-21, 21-18 असा पराभव केला. तीन गेमपर्यंत रंगलेल्या या सामन्यात भारतीय जोडीने निर्णायक क्षणी उत्कृष्ट खेळ करत विजय मिळवला आहे. उपांत्यपूर्व फेरीत त्यांचा सामना आता मलेशियाच्या खाई जिंग कांग आणि ॲरॉन ताई या जोडीशी होणार आहे.
ध्रुव-तनिषाचीही उपांत्यपूर्व फेरीत एन्ट्री
मिश्र दुहेरीत ध्रुव कपिला आणि तनिषा क्रास्टो या भारतीय जोडीनेही शानदार पुनरागमन करत विजय मिळवला. त्यांनी जपानच्या युटा वातानाबे आणि माया तागुची या जोडीचा 8-21, 21-17, 21-16 असा पराभव केला. पहिला गेम गमावल्यानंतर भारतीय जोडीने दमदार कमबॅक करत सलग दोन गेम जिंकले. आता त्यांचा सामना कोरियाच्या किम जे ह्योन जांग-हा जोंग जोडी किंवा मलेशियाच्या तिसऱ्या मानांकित चेन टँग जी-तोह ई वेई यांच्यापैकी एका जोडीशी होणार आहे.
भारताच्या पदकाच्या आशा उंचावल्या
सिंगापूर ओपनमध्ये भारतीय खेळाडूंची आतापर्यंतची कामगिरी पाहता भारताच्या पदकाच्या आशा आणखी उंचावल्या आहेत. अनुभवी सिंधूपासून युवा लक्ष्य सेनपर्यंत आणि दुहेरीतील सात्विक-चिरागपर्यंत सर्वच खेळाडू उत्कृष्ट फॉर्ममध्ये दिसत आहेत.