Ahemdabad : रॉयल चॅलेंजर्स बंगळुरूने (RCB) आयपीएल 2026 च्या अंतिम सामन्यात गुजरात टायटन्सचा 5 विकेट्सने पराभव करत सलग दुसऱ्या वर्षी विजेतेपदावर आपले नाव कोरले. नरेंद्र मोदी स्टेडियमवर झालेल्या या लढतीत विराट कोहलीच्या शानदार अर्धशतकाच्या जोरावर बंगळुरूने 156 धावांचे लक्ष्य 18 षटकांत 5 गडी गमावून पूर्ण केले आणि आयपीएलची ट्रॉफी आपल्या नावावर केली.
विराटचा विराट शो
मोठ्या सामन्यात पुन्हा एकदा विराट कोहलीने आपला अनुभव दाखवून दिला. त्याने अवघ्या 42 चेंडूत 75 धावांची तुफानी खेळी करत बंगळुरूच्या विजयाचा पाया रचला. त्याच्या खेळीत 9 चौकार आणि 3 षटकारांचा समावेश होता. विशेष म्हणजे, हे त्याच्या आयपीएल कारकिर्दीतील सर्वात वेगवान अर्धशतक ठरले. तोच आयपीएल 2026 च्या फायनलचा सामनावीर झाला.
वेगवान सुरुवातीने गुजरातवर दबाव
विराट कोहली आणि वेंकटेश अय्यर यांनी RCB ला आक्रमक सुरुवात करून दिली. अय्यरने 16 चेंडूत 32 धावांची खेळी करत गुजरातच्या गोलंदाजांवर हल्ला चढवला. राशिद खानने एका षटकात दोन विकेट्स घेत सामना रंगतदार केला, मात्र विराटने डाव सांभाळत विजय जवळ आणत १८ व्या षटकांत विजय मिळवला.
RCB गोलंदाजांची भेदक कामगिरी
याआधी नाणेफेक जिंकून प्रथम गोलंदाजीचा निर्णय घेतलेल्या RCB ने गुजरातला 20 षटकांत आठ बाद 155 वर रोखले. गुजरातकडून वॉशिंग्टन सुंदरने नाबाद 50 धावा केल्या, तर इतर फलंदाज अपयशी ठरले. बंगळुरूकडून रसिख सलामने 3 विकेट्स घेत सर्वाधिक प्रभाव टाकला. जोश हेझलवूड आणि भुवनेश्वर कुमार यांनी प्रत्येकी 2 बळी घेत गुजरातला मोठी धावसंख्या उभारण्यापासून रोखले.
सलग दुसरे विजेतेपद
गेल्या हंगामात पहिले आयपीएल विजेतेपद जिंकणाऱ्या RCB ने यंदाही जेतेपद कायम राखत इतिहास रचला. सलग दोन आयपीएल ट्रॉफी जिंकणाऱ्या मोजक्या संघांमध्ये बंगळुरूने स्थान मिळवले आहे. आयपीएल 2025 नंतर आता आयपीएल 2026 मध्ये ट्रॉफी जिंकली आहे
आयपीएल पर्पल कॅप : कागिसो रबाडा
आयपीएल ऑरेंज कॅप : वैभव सूर्यवंशी
आयपीएलचे विजेते
चेन्नई सुपर किंग्स - २०१०, २०११, २०१८, २०२१, २०२३
मुंबई इंडियन्स - २०१३, २०१५, २०१७, २०१९, २०२०
कोलकाता नाइट रायडर्स - २०१२, २०१४, २०२४
रॉयल चॅलेंजर्स बंगळरू - २०२५, २०२६
राजस्थान रॉयल्स - २००८
सनरायझर्स हैदराबाद - २०१६
डेक्कन चार्जर्स - २००९
गुजरात टायटन्स - २०२२