GST Revenue Collection in May : मे महिन्यात जीएसटी महसूल संकलन १.९४ लाख कोटी रुपयांच्या पुढे

नवी दिल्ली : देशाच्या वस्तू आणि सेवा कर (जीएसटी) संकलनात वाढ नोंदवण्यात आली आहे. मे महिन्यात जीएसटी महसूल संकलन ३.२ टक्क्यांनी वाढून १.९४ लाख कोटी रुपयांहून अधिक झाले आहे. गेल्या वर्षी मे महिन्यात एकूण जीएसटी महसूल संकलन १.८८ लाख कोटी रुपये होते. (GST Revenue Collection in May)

जीएसटी महासंचालनालयाने सोमवारी जारी केलेल्या आकडेवारीनुसार, वस्तू आणि सेवांच्या पुरवठ्यात झालेली सुधारणा तसेच आयातीवरील कर संकलनात सातत्याने झालेली वाढ यामुळे जीएसटी महसूल संकलनात ही वाढ झाली आहे. आकडेवारीनुसार, मे महिन्यात देशांतर्गत व्यवहारांमधून केंद्रीय जीएसटी (सीजीएसटी) संकलन ३७,३९७ कोटी रुपये, राज्य जीएसटी (एसजीएसटी) ४५,१४३ कोटी रुपये आणि एकात्मिक जीएसटी (आयजीएसटी) ५१,९९० कोटी रुपये इतके राहिले. (GST Revenue Collection in May)

आकडेवारीनुसार, या कालावधीत करपात्र वस्तूंच्या पुरवठ्यात २६.९ टक्क्यांची वाढ नोंदवली गेली, जी देशांतर्गत मागणीचे प्रतिबिंब दर्शवते. सेवा क्षेत्रात ही वाढ २२.२ टक्के राहिली असून, ती देशांतर्गत उपभोगातील मजबुती दर्शवते. त्याचप्रमाणे, आयातीमधून मिळणारे आयजीएसटी संकलन १९.१ टक्क्यांनी वाढून मे महिन्यात ५९,६५४ कोटी रुपये झाले, जे औद्योगिक क्षमतेच्या विस्ताराचे संकेत मानले जात आहेत. (GST Revenue Collection in May)

याशिवाय, या कालावधीत जीएसटी परतावा (रिफंड) २.६ टक्क्यांनी वाढून २७,२८१ कोटी रुपये झाला. परताव्याचे समायोजन केल्यानंतर मे महिन्यात निव्वळ जीएसटी महसूल संकलन ३.३ टक्क्यांनी वाढून सुमारे १.६७ लाख कोटी रुपये राहिले. यापूर्वी एप्रिल महिन्यात जीएसटी महसूल संकलन ८.७ टक्क्यांनी वाढून २.४३ लाख कोटी रुपयांच्या विक्रमी उच्चांकावर पोहोचले होते. (GST Revenue Collection in May)