Mumbai : भारताची स्टार बॅडमिंटनपटू पीव्ही सिंधू हिने इंडोनेशिया ओपन सुपर 1000 स्पर्धेत विजयी सलामी दिली आहे. मंगळवारी झालेल्या पहिल्या फेरीच्या सामन्यात सिंधूने थायलंडच्या बुसानन ओन्गब्रामंगफान हिचा 25-23, 21-16 अशा सरळ गेममध्ये पराभव करत दुसर्या फेरीत प्रवेश केला आहे.
पहिल्या गेममध्ये दोघांमध्ये मोठी झुंज
जागतिक क्रमवारीत 12व्या स्थानावर असलेल्या सिंधूला पहिल्या गेममध्ये थायलंडच्या प्रतिस्पर्ध्याकडून जोरदार आव्हान मिळालं. दोन्ही खेळाडूंमध्ये प्रत्येक गुणासाठी संघर्ष पाहायला मिळाला. मात्र निर्णायक क्षणी अनुभवाच्या जोरावर सिंधूने 25-23 अशी आघाडी घेत सामना आपल्या नावावर केला. पहिला गेम जिंकल्यानंतर सिंधूचा आत्मविश्वास आणखी वाढला. तिने सुरुवातीपासूनच आक्रमक खेळ करत प्रतिस्पर्ध्यावर दबाव निर्माण केला. परिणामी दुसरा गेम 21-16 असा जिंकत तिने अवघ्या 51 मिनिटांत सामना खिशात घातला.
आता जागतिक क्रमवारीतील अव्वल खेळाडूशी भिडण्याची शक्यता
दुसऱ्या फेरीत सिंधूचा सामना तुर्कस्तानच्या नेस्लिहान आरिन आणि दक्षिण कोरियाच्या जागतिक क्रमवारीत अव्वल असलेल्या आन से-यौंग यांच्यातील विजेत्याशी होणार आहे. त्यामुळे पुढील फेरीत सिंधूसमोर मोठे आव्हान उभे राहण्याची शक्यता आहे.
आज श्रीकांत आणि लक्ष्य सेन मैदानात
पुरुष एकेरीत भारताचे अनुभवी खेळाडू किदाम्बी श्रीकांत आणि लक्ष्य सेन आज आपल्या मोहिमेला सुरुवात करणार आहेत. तसेच महिला एकेरीत मालविका बनसोड हिचाही सामना रंगणार आहे. दुहेरी गटातील भारतीय जोड्यांकडेही चाहत्यांचे लक्ष लागले आहे.
बॅडमिंटन वर्ल्ड फेडरेशन (BWF) च्या प्रतिष्ठेच्या सुपर 1000 स्पर्धांपैकी इंडोनेशिया ओपन ही एक मानाची स्पर्धा मानली जाते. 1982 पासून खेळल्या जाणाऱ्या या स्पर्धेत जगातील सर्वोत्तम खेळाडू सहभागी होत असतात. त्यामुळे येथे मिळणारा प्रत्येक विजय खेळाडूंसाठी अत्यंत महत्त्वाचा मानला जातो.