Nashik Bus Fire News : मुंबई-आग्रा राष्ट्रीय महामार्गावरील (Mumbai-Agra National Highway) चांदवडजवळील रेणुकादेवी घाटात मंगळवारी दुपारी एक मोठी दुर्घटना टळली. मालेगावहून नाशिककडे जाणाऱ्या राज्य परिवहन महामंडळाच्या (एसटी) धावत्या बसला अचानक भीषण आग लागल्याची घटना घडली. चालक आणि वाहकाच्या प्रसंगावधानामुळे बसमधील सर्व ५४ प्रवासी सुखरूप बचावले, तर काही क्षणांतच संपूर्ण बस आगीच्या भक्ष्यस्थानी पडली.
मिळालेल्या माहितीनुसार, दुपारी सुमारे दीड वाजेच्या सुमारास बस रेणुकादेवी घाटातून प्रवास करत असताना अचानक बसमधून धूर निघू लागला. परिस्थितीचे गांभीर्य ओळखत चालकाने तत्काळ बस रस्त्याच्या कडेला उभी केली. चालक आणि वाहकाने वेळीच सतर्कता दाखवत सर्व प्रवाशांना तातडीने बसबाहेर उतरवले.
काही क्षणांतच संपूर्ण बस जळून खाक
प्रवासी सुरक्षित बाहेर पडताच आगीने विक्राळ रूप धारण केले. काही क्षणांतच संपूर्ण बस जळून खाक झाली. आगीची तीव्रता इतकी होती की, बसचा केवळ सांगाडाच शिल्लक राहिला. घटनेची माहिती मिळताच चांदवड नगरपरिषद तसेच टोल नाक्याचे अग्निशमन दल घटनास्थळी दाखल झाले. जवानांनी शर्थीचे प्रयत्न करत आगीवर नियंत्रण मिळवले. मात्र, तोपर्यंत बसचे मोठ्या प्रमाणात नुकसान झाले होते.
दरम्यान, या घटनेमुळे मुंबई-आग्रा महामार्गावरील नाशिककडे जाणारी वाहतूक काही काळ ठप्प झाली होती. महामार्गावर वाहनांच्या लांबच लांब रांगा लागल्या होत्या. पोलिसांनी तत्काळ मदतकार्य करत जळालेली बस बाजूला केली आणि वाहतूक सुरळीत केली. प्राथमिक माहितीनुसार, आगीचे नेमके कारण अद्याप स्पष्ट झाले नसून याबाबत अधिक तपास सुरू आहे.