Nashik : अंबड औद्योगिक वसाहतीत जाणारा मुख्य रस्ता तसेच परिसरातील अंतर्गत रस्त्यांच्या काँक्रिटीकरणासाठी मंजूर झालेल्या सुमारे सहा कोटी रुपयांच्या कामाला अखेर सुरुवात झाल्याने उद्योजकांसह कामगारांना मोठा दिलासा मिळाला आहे.
गेल्या काही दिवसांपूर्वी रस्त्याच्या कामाला सुरुवात झाली होती. मात्र चर्चेत आलेल्या कथित टक्केवारीच्या वादात हे काम अडकले होते. कथित टक्केवारीच्या कारणावरून एका लोकप्रतिनिधीने संबंधित ठेकेदारावर दबाव आणून काम बंद करण्यास भाग पाडल्याचा आरोप प्रभागातील दुसऱ्या एका लोकप्रतिनिधीकडून करण्यात आला होता. त्यामुळे कामगार वसाहतीतील महत्त्वाचे विकासकाम अडवणारा तो लोकप्रतिनिधी कोण, याबाबत सिडको परिसरात जोरदार चर्चा रंगली होती. या कामासाठी प्रभागाच्या नगरसेवकांनी थेट उद्योगमंत्री उदय सामंत यांची भेट घेऊन कामाबाबत माहिती दिली होती.
सहा कोटी रुपयांची तरतूद
एमआयडीसीतील फ्रेश बेकरी व लगतच्या परिसरातील रस्त्यांची अवस्था गेल्या अनेक महिन्यांपासून अत्यंत दयनीय झाली होती. खड्डेमय रस्त्यांमुळे उद्योजक, कामगार आणि वाहनचालकांना मोठा त्रास सहन करावा लागत होता. या समस्येची दखल घेत उद्योजकांनी सातत्याने पाठपुरावा केला होता. तसेच आमदार सीमा हिरे यांनी उद्योगमंत्री उदय सामंत आणि शासनाकडे सातत्याने पाठपुरावा करून रस्त्यांसाठी निधी उपलब्ध करून दिला होता.त्यानंतर जिल्हा नियोजन समितीच्या निधीतून सहा कोटी रुपयांची तरतूद करण्यात आली.
महापालिकेमार्फत या कामाची अंमलबजावणी सुरू करण्यात आली असून काही दिवसांपूर्वी भुयारी गटार व काँक्रिटीकरणाच्या पूर्वतयारीची कामे हाती घेण्यात आली होती. यावेळी काही लोकप्रतिनिधीही उपस्थित होते. मात्र एका बड्या लोकप्रतिनिधीने, “प्रथम भेट घ्या, त्यानंतरच काम सुरू करा,” असे सांगत काम थांबविण्याचे निर्देश दिल्याचा आरोप करण्यात आला होता.अखेर या कामाला प्रारंभ झाला असून लवकरच दर्जेदार रस्ता तयार होणार असल्याने उद्योजक, कामगार आणि नागरिकांनी समाधान व्यक्त केले आहे.