बीड : बीड जिल्ह्यातील अंबाजोगाई येथे एका तलाठ्याने लग्नानंतर अवघ्या 12 दिवसांत आत्महत्या (Suicide) केल्याच्या प्रकरणात धक्कादायक माहिती समोर आली आहे. पोलिसांच्या तपासात पत्नीचे विवाहपूर्व प्रेमसंबंध आणि त्यासंदर्भातील काही बाबी या घटनेमागील कारण असल्याचे निष्पन्न झाले आहे. याप्रकरणी मृत तलाठ्याच्या पत्नीविरोधात गुन्हा दाखल करण्यात आला आहे. (Beed Suicide News)
धनंजय उर्फ गणेश दत्तू कोळी (वय २८) असे आत्महत्या केलेल्या तलाठ्याचे नाव आहे. ते अंबाजोगाई येथे तलाठी म्हणून कार्यरत होते. काही दिवसांपूर्वी त्यांचा विवाह दीपाली नावाच्या तरुणीसोबत झाला होता. दीपाली ही अंबाजोगाई येथील अपर पोलीस अधीक्षक कार्यालयाच्या फॉरेन्सिक विभागात कंत्राटी तत्त्वावर काम करत असल्याची माहिती आहे.
लग्नानंतर काही दिवसांतच धनंजय यांनी २५ मे रोजी राहत्या घरी गळफास घेऊन आत्महत्या केली होती. या घटनेमुळे परिसरात खळबळ उडाली होती. आत्महत्येचे नेमके कारण समोर येत नसल्याने पोलिसांनी सखोल तपास सुरू केला.
तपासादरम्यान पत्नीचे लग्नापूर्वी एका तरुणासोबत प्रेमसंबंध असल्याची माहिती समोर आली. तसेच लग्नानंतरही ती त्या व्यक्तीच्या संपर्कात असल्याचे तपासात आढळल्याचे सांगितले जात आहे. या संदर्भातील काही माहिती धनंजय यांना मिळाल्यानंतर ते मानसिक तणावात होते, अशी माहिती तपासात पुढे आली आहे.
या प्रकरणात मृत तलाठ्याची आई सुनंदा कोळी यांनी अंबाजोगाई पोलीस ठाण्यात तक्रार दाखल केली. तक्रारीच्या आधारे पोलिसांनी पत्नी दीपाली कोळी हिच्याविरोधात आत्महत्येस प्रवृत्त केल्याप्रकरणी गुन्हा नोंदवला आहे.
सध्या पोलीस या प्रकरणाचा अधिक तपास करत असून, सर्व बाबींची पडताळणी केली जात आहे. तपास पूर्ण झाल्यानंतरच या प्रकरणातील संपूर्ण सत्य स्पष्ट होणार आहे.