राज्यात गेल्या अनेक दिवसांपासून गुन्हेगारांचे प्रमाण वाढत चालले आहे. अशातच आणखी एका हत्येची घटना समोर आली आहे. संशयावरून आपल्या जवळच्या मित्राची हत्या केल्याची घटना उघडकीस आली आहे. ही घटना महाराष्ट्रातील यवतमाळ (Yavatmal Murder Case) जिल्ह्यातील आहे. अवधूतवाडी पोलीस ठाण्यात या प्रकरणी गुन्हा नोंदवण्यात आला असून तीन आरोपींना अटक करण्यात आले आहे. (Friend’s Murder)
नेमकं काय घडलं ?
तेजस गायकवाड असं हत्या झालेल्या तरुणाचे नाव आहे. त्याच्याच तीन मित्रांनी मिळून त्याची हत्या केली आहे. तिघांन्ही घरात घुसून धारधार शस्त्राने तेजसच्या शरिरावर सपासप वार केले. हा हल्ला इतका भयंकर होता की, तेसजचा जागीच मृत्यू झाला. या घटनेनंतर परिसरात एकच खळबळ उडाली होती. घटनेची तात्काळ माहिती पोलिसांना देण्यात आली. पोलिसांनी घटनास्थळी मृतदेहाचा पंचनामा केला आणि घटनेचा तपास सुरु केला.
पोलिसांनी दिलेल्या माहितीनुसार, रोहन इंगळे (वय २८), हर्षल उर्फ टोबू मसराम (वय २०) आणि प्रणय गुंजाळ (वय २२) या तिघांना अटक करण्यात आली आहे. आरोपी आणि मृत तेजस हे एकमेकांचे जवळचे मित्र होते. मात्र, काही दिवसांपूर्वी सचिन उर्फ येडा राठोड या तरुणाबाबतची माहिती तेजसने दुसऱ्या गटाला दिल्याचा संशय आरोपींना होता.
याच संशयातून आरोपींनी तेजसचा काटा काढण्याचा निर्णय घेतल्याचे तपासात समोर आले आहे. ४ जून रोजी दुपारी सुमारे १ वाजण्याच्या सुमारास तिघेही धारदार शस्त्रे घेऊन तेजसच्या घरात पोहोचले. घरात घुसल्यानंतर त्यांनी त्याच्यावर अचानक हल्ला केला. या हल्ल्यात तेजस गंभीर जखमी झाला आणि त्याचा जागीच मृत्यू झाला.
अन् स्टेटसवर ठेवली 'ती' स्टोरी
या प्रकरणातील आणखी एक धक्कादायक बाब म्हणजे मुख्य आरोपी रोहन इंगळे याने काही दिवसांपूर्वी सोशल मीडियावर एक स्टेटस टाकले होते. त्यात त्याने सचिन राठोडला वाढदिवसाचे गिफ्ट लवकरच देणार असल्याचे लिहिले होते. पोलिसांच्या तपासात हे कथित 'गिफ्ट' म्हणजे तेजसची हत्या असल्याचे समोर आले आहे.
घटनेनंतर पोलिसांनी तातडीने तपास सुरू केला आणि त्याच दिवशी सायंकाळी नेर परिसरातून फरार झालेल्या तिन्ही आरोपींना ताब्यात घेतले. मृत तरुणाच्या आईच्या तक्रारीवरून गुन्हा दाखल करण्यात आला असून पुढील तपास सुरू आहे.